Ба муносибати 29-солагии Рӯзи Ваҳдати миллӣ дар Маҷлиси намояндагон ҳамоиш баргузор гардид

ДУШАНБЕ, 25.06.2026 /АМИТ «Ховар»/. Имрӯз дар Маҷлиси намояндагони Маҷлиси Олии Ҷумҳурии Тоҷикистон ба муносибати 29-умин солгарди «Рӯзи Ваҳдати миллӣ» ҳамоиш баргузор гардид. Дар ин хусус ба АМИТ «Ховар» аз Маҷлиси намояндагон хабар доданд.

Дар ҳамоиш Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода иброз дошт, ки ҷашни Ваҳдати миллӣ дастоварди беназири миллати тоҷик буда,  маҳз ба шарофати талошҳои пайгиронаву созандаи Президенти Ҷумҳурии Тоҷикистон  муҳтарам Эмомалӣ Раҳмон ба халқи Тоҷикистон муяссар гардидааст.

Ҳамчунин изҳор шуд, ки ташаббуси наҷибу беназир, фарҳангпарварона, таърихсоз ва инсондӯстонаи қаҳрамонфарзанди миллат, Президенти ваҳдатсарову сулҳофари Тоҷикистон муҳтарам Эмомалӣ Раҳмон — ба Ватан баргардондани пораи  хоки оромгоҳи фарзандони фарзонаи миллат, қаҳрамонони Тоҷикистон Нусратулло Махсум ва Шириншо Шотемур, инчунин чеҳраи барҷастаи фарҳангии таърихи миллат Нисор Муҳаммад шоистаи таъкиди хос аст».

Баён шуд, ки ин иқдоми барҷастаи Пешвои миллат, нишонаи равшани арҷгузории олии давлат ва Ҳукумати Ҷумҳурии Тоҷикистон ба таъриху фарҳанги миллӣ, озодию соҳибихтиёрӣ ва албатта, ба хизматҳои фарзандони сарсупурдаи Ватан буда, дар саҳифаҳои таърих ҷовидон сабт мегардад.

Таъкид гардид, ки ҷаҳду талошҳои  муҳтарам Эмомалӣ Раҳмон барои ободиву шукуфоии Ватан ва таҳкими ваҳдати миллӣ барои ҳар яки мо манбаи илҳом, азму ғайрати дучанд аст. Мо бояд аз ҳамаи имкониятҳо самаранок ва оқилона истифода бурда, барои дар оянда боз ҳам ободу зебо шудани Тоҷикистони азиз саҳм гузорем. Ҳар як шаҳрванди Тоҷикистонро зарур аст, ки аз ин дастоварди бузурги таърихӣ ҳифз намояд, сабақҳои талхи гузашта ва воқеиятҳои мураккаби ҷаҳони имрӯзро фаромӯш насозад, барои таҳкими сулҳу субот, ҳифзи манфиатҳои миллӣ ва рушди давлати соҳибистиқлоли тоҷикон саҳми арзандаи худро гузорад.

АКС: Маҷлиси намояндагони Маҷлиси Олии Ҷумҳурии Тоҷикистон