Дар Ашт боғи интенсивӣ бо усули объёрии қатрагӣ ва боронӣ ташкил карда шудааст

ДУШАНБЕ, 23.06.2026 /АМИТ «Ховар»/. Дар Ҷамоати деҳоти Понғози ноҳияи Ашт боғи интенсивӣ – қатравии «Боғи ибрат» ташкил карда шудааст, ки муовини Сарвазири Ҷумҳурии Тоҷикистон Сулаймон Зиёзода бо  рафти  нашъунамои  дарахтони ин боғ   шинос шуд.

Тавре ба АМИТ «Ховар» аз Мақомоти иҷроияи ҳокимияти давлатии ноҳияи Ашт хабар доданд, муовини Сарвазири мамлакат бо вазъи соҳаи кишоварзӣ ва истифодаи самараноки обу замин шинос  гардид.

«Боғи ибрат» аз ҷониби соҳибкор Зайлобиддин Мақсудҷонов ташкил карда шуда, он аз соли 2022 инҷониб фаъолият дорад. Иншооти хатти обгирааш дар доманакӯҳ ҷойгир буда, аз 5 чоҳи амудӣ бо чуқурии 20-25 метр иборат мебошад. Оби полезӣ тариқи дастгоҳҳои обкашӣ кашида шуда, ба ҳавзи бунёдгардида, ки ғунҷоишаш 600 метри куббӣ аст, ворид карда мешавад. Аз он, тариқи қубурҳои обдиҳӣ бо усули қатрагӣ объёрӣ карда мешаванд. Ҳамзамон объёрии боронӣ низ ба роҳ монда шудааст.

Масоҳати умумии боғ 13,41 гектарро ташкил намуда, ба миқдори 15 ҳазор бех ниҳолҳои бисёрсолаи гелос шинонида шудааст.

Дар қисмати даромадгоҳи боғ 100 бех навъи ниҳоли дарахти бисёрсолаи павлония ва 100 бех ниҳоли дарахти ҳамешасабзи арча шинонида шудааст.

Дар фарҷоми суҳбат  муовини Сарвазири мамлакат Сулаймон Зиёзода ба масъулони ноҳия барои тақвияти корҳои саҳроӣ, афзун намудани ҳаҷми маҳсулотҳои кишоварзӣ, истифодаи самараноки замин тавсияҳо дод.

АКС: Мақомоти иҷроияи ҳокимияти давлатии ноҳияи Ашт