Дар Бохтар бахшида ба Рӯзи Ваҳдати миллӣ ҳамоиши сиёсӣ-фарҳангӣ баргузор гардид

ДУШАНБЕ, 25.06.2026 /АМИТ «Ховар»/.  24 июн дар мавзеи таърихии  «Теппаи Қӯрғон»-и шаҳри Бохтар бо ташаббуси Кумитаи иҷроияи Ҳизби Халқии Демократии Тоҷикистон дар вилояти Хатлон ба ифтихори Рӯзи Ваҳдати миллӣ зери унвони «Ваҳдати миллӣ — муҳимтарин омили рушди ҷомеа» ҳамоиши сиёсӣ-фарҳангӣ баргузор гардид. Дар ин хусус ба АМИТ «Ховар» аз Кумитаи иҷроияи Ҳизби Халқии Демократии Тоҷикистон дар вилояти Хатлон хабар доданд.

Раиси Кумитаи иҷроияи Ҳизби Халқии Демократии Тоҷикистон дар вилояти Хатлон Ҷамшед Саидзода иброз дошт, ки барқарор гардидани сулҳ ва ризоияти миллӣ на танҳо барои таъмини амнияти мамлакат замина гузошт, балки барои рушди минбаъдаи низоми сиёсӣ, иқтисодӣ ва фарҳангии Тоҷикистон шароити мусоид муҳайё кард. Дар натиҷа, Ҷумҳурии Тоҷикистон тавонист, ки мавқеи худро дар арсаи байналмилалӣ таҳким бахшида, ба марҳилаи рушди устувори давлатӣ ворид гардад.

Таъкид шуд, ки омӯзиши нақш ва аҳамияти Ваҳдати миллӣ дар таҳкими давлатдории муосири Тоҷикистон аҳамияти назариявӣ ва амалӣ дошта, барои дарки равандҳои рушди ҷомеаи тоҷик муҳим мебошад.

Иштирокчиён зимни сухан гуфтан аз аҳамияти сарнавиштсози баргузории Иҷлосияи XVI Шурои олии Ҷумҳурии Тоҷикистон дар шаҳри Хуҷанд ва Раиси Шурои Олӣ интихоб гардидани муҳтарам Эмомалӣ Раҳмон дар таъмини суботи сиёсӣ ва муттаҳид сохтани ҷомеа ёдовар шуданд.

Дар қисми фарҳангии чорабинӣ аз ҷониби аҳли ҳунар суруду таронаҳои тараннумгари муҳаббати Ватан ва  ваҳдату ягонагии миллат пешниҳод гардид.

АКС: Кумитаи иҷроияи Ҳизби Халқии Демократии Тоҷикистон дар вилояти Хатлон