Дар Боку ҷаласаи Шурои Ассамблеяи парламентии Осиёӣ (APA) баргузор гардид

ДУШАНБЕ, 23.06.2026 /АМИТ «Ховар»/. Дар ҳошияи Иҷлосияи 20-уми Конфронси Иттиҳоди парламентии давлатҳои аъзои Созмони ҳамкории исломӣ (PUIC) дар шаҳри Боку, вакилони Маҷлиси намояндагони Маҷлиси Олии Ҷумҳурии Тоҷикистон дар ҷаласаи Шурои Ассамблеяи парламентии Осиёӣ (APA) иштирок намуданд. Дар ин хусус ба АМИТ «Ховар» аз Маҷлиси намояндагон хабар доданд.

Зимни ҷаласа масъалаҳои марбут ба таҳкими ҳамкории байнипарлумонӣ, пешбурди муколамаи тамаддунҳо, густариши дипломатияи фарҳангӣ ва таҳкими нақши парлумонҳо дар татбиқи ҳадафҳои рушди устувор мавриди баррасӣ қарор гирифтанд.

Иброз гардид, ки бо роҳнамоии арзишҳои бунёдии эҳтироми ҳуқуқи инсон, ҳамбастагии байналмилалӣ, ҳамзистии осоишта ва ҳамкории мутақобилан судманд, ки дар Оинномаи Созмони Милали Муттаҳид ва санадҳои байналмилалӣ инъикос ёфтаанд, Ҷумҳурии Тоҷикистон ба рушди муколамаи байнифарҳангӣ ва таҳкими ҳамдигарфаҳмии байни миллатҳо аҳамияти аввалиндараҷа медиҳад.

Парлумони Ҷумҳурии Тоҷикистон ҳамчун раиси Кумитаи доимии масъалаҳои иҷтимоӣ ва фарҳангии Ассамблеяи парламентии Осиё аз ҳамкории созанда ва саҳми арзишманди парлумонҳои давлатҳои аъзо дар пешбурди рӯзномаи умумии Осиё дар самтҳои иҷтимоӣ, фарҳангӣ ва башардӯстона қадрдонӣ менамояд.

Дар ҷаласа дар бораи омодагии Тоҷикистон барои баргузории ҷаласаи навбатии Кумитаи доимии масъалаҳои иҷтимоӣ ва фарҳангии Ассамблеяи парламентии Осиё  дар рӯзҳои 24 то 27 сентябри соли равон дар шаҳри Душанбе маълумот пешниҳод гардид.

Дар ҷараёни мубодилаи афкор иштирокчиён саҳми Ҷумҳурии Тоҷикистонро дар пешбурди ташаббусҳои ҷаҳонӣ оид ба масъалаҳои обу иқлим, таҳкими амнияти байналмилалӣ, пешгирии таҳдидҳои муосир ва рушди фарҳанги сулҳ дар сатҳи байналмилалӣ баланд арзёбӣ намуданд. Дар ин замина, нақши Тоҷикистон ҳамчун давлати ташаббускор ва ҷонибдори пайгиронаи ҳамкории бисёрҷониба, муколамаи тамаддунҳо ва арзишҳои башардӯстона махсус таъкид гардид.

Дар анҷоми вохӯрӣ иштирокчиён омодагии худро барои идомаи ҳамкории созанда дар доираи Ассамблеяи парламентии Осиё ва иштироки фаъол дар ҷаласаи навбатии Кумитаи доимии масъалаҳои иҷтимоӣ ва фарҳангӣ дар шаҳри Душанбе изҳор намуда, ба Ҷумҳурии Тоҷикистон дар татбиқи ҳадафҳои муштарак оид ба таҳкими сулҳ, субот, рушди устувор ва ҳамгироии минтақавӣ комёбиҳо орзу намуданд.

АКС: Маҷлиси намояндагони Маҷлиси Олии Ҷумҳурии Тоҷикистон