Дар Душанбе масъалаи ҳамкории Тоҷикистон бо шарикони рушд дар соҳаи обрасонӣ ва санитария баррасӣ шуд

ДУШАНБЕ, 02.06.2026 /АМИТ «Ховар»/. Тоҷикистон дар сатҳи миллӣ ислоҳоти васеъмиқёсро дар бахши об амалӣ намуда, «Стратегияи миллии оби Ҷумҳурии Тоҷикистон барои давраи то соли 2040» ва «Барномаи давлатии таъминоти оби нӯшокӣ ва санитария барои солҳои 2025-2029»-ро қабул намудааст. Дар ин хусус зимни мулоқоти Вазири энергетика ва захираҳои оби Ҷумҳурии Тоҷикистон Далер Ҷумъа бо роҳбари Намояндагии минтақавии Федератсияи байналмилалии ҷамъиятҳои Салиби Сурх ва Ҳилоли Аҳмар дар Осиёи Марказӣ хонум Севал Гузелкилинк дар шаҳри Душанбе иттилоъ дода шуд.

АМИТ «Ховар» бо истинод ба Вазорати энергетика ва захираҳои оби Ҷумҳурии Тоҷикистон иттилоъ медиҳад, ки дар мулоқот масъалаҳои ҳамкории башардӯстона, таҳкими устувории ҷомеаҳо, рушди соҳаи обрасонӣ ва санитария мавриди баррасӣ қарор гирифтанд.

‎ Далер Ҷумъа гуфт, ки Ҷумҳурии Тоҷикистон ба масъалаҳои об дар сатҳи глобалӣ, минтақавӣ ва миллӣ аҳамияти махсус медиҳад.

Ҷонибҳо иброз доштанд, ки масъалаҳои вобаста ба об на танҳо ҷанбаи экологӣ ва инфрасохторӣ дошта, балки барои рушди устувор, тандурустии аҳолӣ, амнияти озуқаворӣ, суботи иҷтимоӣ ва пешгирии хавфҳои башардӯстона аҳамияти калидӣ доранд.

Дар ин замина, фаъолияти Федератсияи байналмилалии ҷамъиятҳои Салиби Сурх ва Ҳилоли Аҳмар дар самти беҳтар намудани дастрасӣ ба оби нӯшокии бехатар, бахусус дар минтақаҳои дурдасту кӯҳистон, баланд арзёбӣ гашт.

АКС: Вазорати энергетика ва захираҳои оби Ҷумҳурии Тоҷикистон