Дар ноҳияи Дӯстӣ ҷамъоварии ҳосили полезӣ идома дорад

ДУШАНБЕ, 17.06.2026 /АМИТ «Ховар»/. Кишоварзони Ҷамоати деҳоти Деҳқонободи ноҳияи Дӯстӣ ба парвариши ҳама навъҳои зироат машғул гардида, дар кишти такрорӣ аллакай маккаи дон, шолӣ, лаблабуи сурх, карам ва дигар навъҳои зироатро ки ба мавсим мувофиқанд, кишт кардаанд, иттилоъ медиҳад АМИТ «Ховар».

Сокини ин ҷамоат Нурмуҳаммад Чориев ҳамасола ба кишту кори полезӣ сару кор дошта, тавассути меҳнати аҳлонаи худ бо хонаводааш ҳосили баланд мерӯёнад. Айни замон аҳли хоҷагӣ ба ҷамъоварии тарбуз машғул буда, маҳсулоти онҳоро соҳибкорони шаҳри Душанбе бо нархи дастрас харидорӣ намуда, ба бозорҳои истеъмолӣ пешниҳод менамоянд.

Тавре дар суҳбат бо мухбири АМИТ «Ховар» Нурмуҳаммад Чориев иброз намуд, ин чиниши аввали тарбуз буда, дар саҳро ҳоло ҳосили пухтарасида зиёд аст. Ӯ азм дорад, ки корҳои агротехникӣ ва додани нуриҳои минералиро анҷом дода, то ду се маротибаи дигар ҳосили дилхоҳ ба даст биёрад. Ба гуфтаи ин деҳқони соҳибтаҷриба, бояд ҳар ниҳоли тарбуз, яъне палакро хуб нигоҳубин намуд, эҳтиёт кардан лозим аст, зеро дар ҳолати  хушк шудани палак тарбузи аз он кандашуда метавонад зуд пажмурда шавад.

«Яке аз омилҳои фаровонҳосилӣ интихоби тухмии хушсифат, коркарди саривақтии агротехникӣ ва додани ғизоҳои минералӣ аз рӯи меъёр мебошад. Истифодаи таҷрибаи муосир, кишти зери плёнка имкон медиҳад, ки ҳар як ниҳоли тарбуз хуб нигоҳдорӣ шавад ва инкишоф ёбад», — таъкид намуд ҳамсуҳбати мо.

Нурмуҳаммад Чориев изҳор дошт, ки пас аз анҷоми ҷамъоварии ҳосил  кишти ҷуворимакка гузаронида, захираи хӯроки чорворо низ таҳия месозад.

АКС: АМИТ «Ховар»