Дар ноҳияи Зафаробод ҷамъоварии ҳосили ғалладонагиҳо оғоз гардид

ДУШАНБЕ, 02.06.2026 /АМИТ «Ховар»/. Дар хоҷагиҳои кишоварзии ҳудуди Ҷамоати шаҳраки Ҳамид Алиеви   ноҳияи Зафаробод ба ҷамъоварии ҳосили ғалладонагиҳо оғоз намуданд. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии ноҳияи Зафаробод хабар медиҳад.

Хоҷагиҳои деҳқонии «Мавҷ-1», «Фаррух-Ш» ва «Дониёр» аз заминҳои ғалладонагӣ киштшуда ҳосили хуб гирифтанд. Кишоварзон иброз доштанд, ки дар заминҳои холишуда кишти такрориро низ ба роҳ мемонанд. Барои рӯёнидани ҳосили дуюм дар заминҳои дараваш анҷомёфта сабзавоту макка, хӯроки чорво кишт карда мешавад. Вазъи нашъунамои дигар зироат низ мавриди таваҷҷуҳ қарор гирифта шудааст.

Дар ноҳия дар майдони зиёда аз 6200 гектар ғалладонагиҳо кишт карда шудааст, ки аз он 2500 гектар гандум мебошад.

Масъулин барои истифодаи самараноки замин ва гузаронидани кишти такрории зироат ба Раёсати кишоварзӣ, раисони ҷамоатҳо ва деҳқонон риояи ҳатмии  қоидаҳои агротехникиро тавсия доданд.

АКС: Мақомоти иҷроияи ҳокимияти давлатии ноҳияи Зафаробод