Дар соҳили Сирдарёи шаҳри Хуҷанд шиногоҳи нав ба истифода дода шуд

ДУШАНБЕ, 23.06.2026 /АМИТ «Ховар»/. Дар доираи тадбирҳои ободониву фароҳамсозии шароити мусоид барои истироҳату фароғати сокинон ва меҳмонон дар соҳили чапи Сирдарёи шаҳри Хуҷанд шиногоҳи нав мавриди истифода қарор дода шуд.

Тавре ба АМИТ «Ховар» аз Хадамоти матбуоти Раиси вилояти Суғд хабар доданд, шиногоҳ бо тамоми инфрасохтор аз ҷониби Идораи сохтмони асосии вилояти Суғд сохта шуда, на фақат барои шаҳрвандон, балки барои хориҷиён низ пешбинӣ шудааст.

Бо фаро расидани тобистон ва гарм шудани ҳаво сокинон дар мавзеъҳои истироҳатӣ, аз ҷумла шиногоҳҳо вақти зиёди худро мегузаронанд. Барои истироҳату фароғати шаҳрвандон дар соҳили Сирдарё ҳамасола шароити зарурӣ фароҳам оварда шуда, майдонҳои истироҳату фароғат, таъмини бехатарии сокинон, соябонҳои истироҳатию обутобдиҳӣ, ҳуҷраҳои ивази либос ва дигар эҳтиёҷоти шиногоҳ муҳайё гардидааст.

Зимни ифтитоҳи шиногоҳ таъкид гардид, ки минбаъд низ чунин мавзеъҳои истироҳатӣ бунёд гардида, барои кӯдакон ҳавзҳои сунъии махсус низ сохта хоҳанд шуд.

Ба масъулини бахши Раёсати Кумитаи ҳолатҳои фавқулода ва мудофиаи граждании вилояти Суғд дар шаҳри Хуҷанд, инчунин дигар сохторҳои дахлдор барои таъмини амнияти шаҳрвандон ҳангоми оббозӣ, ташкили навбатдории доимии наҷотдиҳандагон ва риояи қатъии қоидаҳои бехатарӣ дастур дода шуд.

АКС: Хадамоти матбуоти Раиси вилояти Суғд