Дар Тоҷикистон низоми электронии E-PERMIT ба кор дароварда шуд

ДУШАНБЕ,01.06.2026 /АМИТ «Ховар»/. Дар Тоҷикистон низоми нави рухсатномаҳои электронӣ (Electronic permit System) ва платформаи мутамаркази пардохт ба кор даромад, ки раванди таҳия ва мубодилаи рухсатномаҳои нақлиётиро дар мамлакат сода ва рақамӣ мегардонад. Дар ин хусус АМИТ «Ховар» бо истинод ба Вазорати нақлиёти Ҷумҳурии Тоҷикистон иттилоъ медиҳад.

Низоми нави рухсатномаҳои электронӣ ва платформаи мутамаркази биллингӣ, ки раванди додани рухсатномаҳои нақлиётиро дар ҷумҳурӣ барои ҳамлу нақли байналмилалӣ сода мегардонад ва ба формати рақамӣ табдил медиҳад, бо дастгирии Иттиҳоди Аврупо ва Ҳукумати Олмон дар Тоҷикистон ба роҳ монда шудааст.

Ин низом як қадами муҳим дар роҳи баланд бардоштани суръат, шаффофият ва бехатарии хизматрасониҳои нақлиётӣ мебошад.

Вазирони нақлиёти Тоҷикистон ва Узбекистон расман созишномаи табодули иҷозатномаҳои электрониро (ePermit) имзо карданд. Дар рӯзҳои аввали пас аз оғози кор Тоҷикистон 100 адад рухсатномаи аввалини электрониро тавассути низоми нав ба Узбекистон интиқол дод.

Низоми нави рухсатномаҳои электронӣ ва платформаи ҳисоббаробаркунии мутамарказ дар доираи Барномаи рушди иқтидори долони нақлиётии Транскаспий, ки аз ҷониби Иттиҳоди Аврупо ва Ҳукумати Олмон маблағгузорӣ ва тавассути GIZ (Ҷамъияти ҳамкории байналмилалии Олмон; Deutsche Gesellschaft für Internationale Zusammenarbeit) амалӣ карда мешавад, навсозӣ шудааст.

Ин ба ширкатҳои нақлиётӣ муҳити бехатар ва ҳамгирошударо барои пешниҳоди дархостҳои дастаҷамъона, идоракунии тақсимоту истифодаи рухсатномаҳо, самаранокӣ ва шаффофияти пардохтҳо фароҳам меорад.

Ҳисоббаробаркунии мутамарказ бо низомҳои бонкӣ ва хизматрасониҳои пардохтҳои мобилӣ ҳамгиро мешавад ва санҷиши онлайнӣ, муқоисаи автоматӣ ва шаффофияти пурраи молиявиро тавассути тадбирҳои боэътимоди ҳифзи маълумот таъмин мекунад. Бо ҷорӣ шудани низоми нав, вақти барои гирифтани рухсатномаи зарурӣ хеле коҳиш ёфт.

АКС: Вазорати нақлиёти Ҷумҳурии Тоҷикистон