Форум ва намоишгоҳи байналмилалии сайёҳии «Хатлон — сарзамини тамаддунҳо ва саёҳат» оғоз гардид

ДУШАНБЕ, 04.06.2026. /АМИТ «Ховар»/. Имрӯз дар деҳаи Чилдухтарони ноҳияи Муъминобод Форум ва намоишгоҳи байналмилалии сайёҳии «Хатлон — сарзамини тамаддунҳо ва саёҳат» оғоз гардид. Ин чорабинӣ то 5 июн идома меёбад, иттилоъ медиҳад АМИТ «Ховар» бо истинод ба Мақомоти иҷроияи ҳокимияти давлатии вилояти Хатлон.

Дар чорабинии байналмилалӣ иштироки намояндагони зиёда аз 20 давлати ҷаҳон, аз ҷумла Узбекистон, Қирғизистон, Қазоқистон, Русия, Ҷумҳурии Мардумии Чин, Туркия, Эрон ва дигар кишварҳо дар назар дошта шудааст. Ба форум ҳамчунин намояндагони ширкатҳои сайёҳӣ, сармоягузорон, корпусҳои дипломатӣ, созмонҳои байналмилалӣ, шарикони рушд ва намояндагони воситаҳои ахбори омма даъват гардидаанд.

Иштирокдорони форум метавонанд дар намоишгоҳ дар бораи ҳунарҳои қадимаи халқи тоҷик — чакандӯзӣ, кулолгарӣ, зардӯзӣ, кандакорӣ ва дигар намудҳои ҳунарҳои суннатӣ маълумоти муфассал гиранд. Зеро маҳз ҳунарҳои мардумӣ яке аз бахшҳои муҳимми рушди сайёҳӣ ба ҳисоб мераванд.

Дар форум масъалаҳои муҳимми рушди соҳаи сайёҳӣ, дурнамои ҳамкорӣ ва имкониятҳои нави сармоягузорӣ баррасӣ мешаванд. Яке аз бахшҳои асосии форум панелҳои байналмилалӣ мебошанд. Дар онҳо мутахассисон ва коршиносон масъалаҳои мубрами соҳаи сайёҳиро муҳокима менамоянд, аз ҷумла сайёҳии рақамӣ ва зеҳни сунъиро.

Дар доираи форум вохӯриҳои соҳибкорӣ дар шакли B2B баргузор мешаванд, ки барои ташкили ҳамкории нав ва ҷалби сармоягузорӣ мусоидат мекунанд. Дар чунин мулоқотҳо намояндагони ширкатҳо метавонанд лоиҳаҳои худро муаррифӣ намуда, роҳҳои нави ҳамкориро муайян созанд.

Тибқи иттилои масъулин, танҳо дар соли 2025 ба вилояти Хатлон як миллиону 647 ҳазор сайёҳ ташриф овардааст. Ин нишондиҳанда аз афзоиши таваҷҷуҳ ба минтақа ва рушди тадриҷии соҳаи сайёҳӣ шаҳодат медиҳад.

Рушди сайёҳӣ ба иқтисоди минтақа таъсири мусбат мерасонад. Бо афзоиши шумораи сайёҳон талабот ба меҳмонхонаҳо, нақлиёт, хизматрасонӣ, маҳсулоти ҳунармандӣ ва дигар бахшҳои иқтисодӣ низ зиёд мешавад. Дар баробари ин, ҷойҳои нави корӣ таъсис меёбанд ва имкониятҳои соҳибкорӣ бештар мешаванд.

Форум ва Намоишгоҳи байналмилалии сайёҳии«Хатлон- сарзамини тамаддунҳо ва саёҳат» метавонад як қадами устувори Тоҷикистон дар роҳи табдил ёфтан ба яке аз самтҳои ҷолиби сайёҳии минтақа бошад.

Ин чорабинӣ на танҳо имкониятҳои вилояти Хатлон, балки иқтидорҳои тамоми кишварро ба ҷаҳониён муаррифӣ мекунад. Тоҷикистон дорои табиати нотакрор, таърихи қадима ва фарҳанги ғанӣ мебошад ва истифодаи дурусти ин имкониятҳо метавонад дар оянда барои рушди иқтисодӣ ва мустаҳкам гардидани мавқеи кишвар дар арсаи байналмилалӣ саҳми назаррас гузорад.

АКС: Мақомоти иҷроияи ҳокимияти давлатии вилояти Хатлон