Лоиҳаи «Тақвияти иқтидори Тоҷикистон барои ҷалб ва истифодаи маблағгузории иқлимӣ» ҷамъбаст гардид

ДУШАНБЕ, 29.06.2026 /АМИТ «Ховар»/. Лоиҳаи «Тақвияти иқтидори Тоҷикистон барои ҷалб ва истифодаи маблағгузории иқлимӣ», ки аз ҷониби Ҷамъияти Олмон оид ба ҳамкории байналмилалӣ (GIZ) дар ҳамкорӣ бо Кумитаи ҳифзи муҳити зисти назди Ҳукумати Ҷумҳурии Тоҷикистон амалӣ карда мешуд, ҷамъбаст гардид. Дар ин хусус АМИТ «Ховар» бо истинод ба Кумитаи ҳифзи муҳити зисти назди Ҳукумати Ҷумҳурии Тоҷикистон хабар медиҳад.

Дар чорабинӣ намояндагони мақомоти давлатӣ, бахши хусусӣ, ҷомеаи шаҳрвандӣ, созмонҳои байналмилалӣ ва коршиносон иштирок намуда, барои ҷамъбасти натиҷаҳои лоиҳа, мубодилаи таҷриба ва баррасии имкониятҳои минбаъдаи рушди маблағгузории иқлимӣ дар ҷумҳурӣ ибрози назар намуданд.

Гуфта шуд, ки дар натиҷаи татбиқи лоиҳа 120 мутахассис, аз ин 50 зан дониш ва малакаҳои худро дар самти маблағгузории иқлимӣ ва механизмҳои Фонди иқлими сабз (GCF) тақвият бахшиданд. Ва аввалин консепсияи минтақавии лоиҳа барои Фонди иқлими сабз таҳти унвони «Ландшафтҳои ба иқлим устувор дар Осиёи Марказӣ», ки Тоҷикистон, Қирғизистон ва Узбекистонро фаро мегирад, таҳия ва тасдиқ гардида, платформаи миллии маблағгузории иқлимӣ ва низоми рақамии идоракунии донишҳо (KMS) таъсис дода шуд.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон