Мутахассисони «Тоҷикаэронавигатсия» дар ҷаласа оид ба хизматрасонии метеорологии авиатсияи гражданӣ дар Бишкек иштирок намуданд

ДУШАНБЕ, 04.06.2026 /АМИТ «Ховар»/. Мутахассисони Корхонаи воҳиди давлатии «Тоҷикаэронавигатсия» дар 24-умин ҷаласаи муштараки солонаи Гурӯҳи кории 4-уми Иттиҳоди Давлатҳои Мустақил «Хизматрасонии метеорологии авиатсияи гражданӣ» (WG-4) ва Гурӯҳи лоиҳавии Ташкилоти байналмилалии авиатсияи гражданӣ (ICAO) оид ба татбиқи меъёр ва таҷрибаҳои тавсияшуда дар Аврупои Шарқӣ ва Осиёи Марказӣ (PT/EAST METG ICAO), ки дар шаҳри Бишкеки Қирғизистон баргузор гардид, иштирок намуданд.

Тавре АМИТ «Ховар» бо истинод ба Корхонаи воҳиди давлатии «Тоҷикаэронавигатсия» хабар медиҳад, дар ҳамоиш намояндагони ICAO, Кумитаи байнидавлатии авиатсионӣ (МАК), зиёда аз 53 коршинос аз мамлакатҳои Арманистон, Беларус, Гурҷистон, Қазоқистон, Қирғизистон, Озарбойҷон, Тоҷикистон ва Русия иштирок намуданд.

Дар доираи ҷаласаи муштарак инчунин ҳамоиш оид ба ҳамкории амалиётӣ байни марказҳои амалиётии минтақавӣ (ROC) ва марказҳои амалиётии миллии метеорологӣ (NOC) бо таваҷҷуҳ ба табодули иттилоот дар формати рақамии IWXXM баргузор гардид. Ҳамзамон иштирокчиён ҷанбаҳои асосии модернизиатсияи таъмини хизматрасонии метеорологии парвозҳо, чаҳорчӯбаи танзимкунандаи фаъолияти марказҳои минтақавӣ, татбиқи усули рақамии интиқоли маълумоти IWXXM дар давлатҳои минтақа, инчунин дурнамои гузариши марҳила ба марҳила ба муҳити иттилоотии SWIM – консепсияи глобалии ҳамкории рақамӣ байни ҳамаи иштирокчиёни ҳаракати ҳавоӣ, аз ҷумла ширкатҳои ҳавопаймоӣ, фурудгоҳҳо, хадамоти метеорологӣ, хадамоти идоракунии ҳаракати ҳавоӣ ва ғайраро ҳамаҷониба баррасӣ намуданд.

Иштирокдорон тағйироти глобалӣ, аз ҷумла тағйироти эҳтимолӣ ба замимаи 3-и Конвенсияи Чикаго ва қоидаҳои нави PANS-MET-ро муфассал муҳокима намуданд.

Дар анҷом қадамҳои афзалиятноки миллӣ ва минтақавӣ барои татбиқи Нақшаи аэронавигатсионии глобалӣ ва таҷдиди системаҳои авиатсионӣ (GANP/ASBU) муайян карда шуданд. Маҷмуи ҳуҷҷатҳои корӣ инчунин барои муаррифии минбаъда дар ҷаласаҳои Гурӯҳи таъмини хизматрасонии метеорологӣ (METG) ва Гурӯҳи банақшагирии аэронавигатсионии аврупоӣ (EANPG) тартиб дода шуданд.

Иштироки мутахассисони Корхонаи воҳиди давлатии «Тоҷикаэронавигатсия» дар ин ҷаласа барои табодули таҷриба, баланд бардоштани сифати хизматрасонии метеорологии авиатсионӣ ва татбиқи системаҳои рақамии соҳавӣ дар ҷумҳурӣ заминаи мусоид фароҳам меорад.

АКС: Корхонаи воҳиди давлатии «Тоҷикаэронавигатсия»