Намояндагони Хадамоти обуҳавошиносии Корея бо фаъолияти Агентии обуҳавошиносии Тоҷикистон шинос шуданд

ДУШАНБЕ, 25.06.2026 /АМИТ «Ховар»/. Намояндагони Хадамоти обуҳавошиносии Ҷумҳурии Корея ва Институти метеорологии Корея дар Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон бо вазъи кунунии шабакаи мушоҳидаҳои обуҳавосанҷии мамлакат шинос шуданд.

АМИТ «Ховар» бо истинод ба Агентии обуҳавошиносӣ хабар медиҳад, ки ҳадафи асосии сафари намояндагони Хадамоти обуҳавошиносии Ҷумҳурии Корея ба Тоҷикистон шиносоӣ бо вазъи кунунии шабакаи мушоҳидаҳои обуҳавосанҷии ҷумҳурӣ, арзёбии фаъолияти стансияҳои худкори обуҳавосанҷӣ ва баррасии имкониятҳои таҳкими ҳамкории дуҷониба дар самти рушди инфрасохтори обуҳавошиносӣ, инчунин технологияҳои иттилоотӣ мебошад.

Дар рафти вохӯриҳо ва машваратҳои техникӣ, ҳамзамон шиносоӣ аз вазъи кунунии шабакаи мушоҳидаҳои обуҳавосанҷӣ, фаъолияти стансияҳои худкори обуҳавосанҷӣ, низоми ҷамъоварӣ, коркард ва интиқоли маълумоти соҳавӣ, инчунин инфрасохтори иттилоотии агентӣ мавриди омӯзишу баррасӣ қарор дода шуданд. Инчунин масъалаҳои марбут ба истифода ва такмили серверҳо, шабакаҳои алоқа, системаҳои мониторинг, санҷиш ва насби таҷҳизоти нави мушоҳидавӣ муҳокима шуданд.

Ҷонибҳо доир ба роҳҳои густариши ҳамкории техникию илмӣ, табодули таҷриба, омӯзиши мутахассисон ва ҷорӣ намудани технологияҳои муосири обуҳавошиносӣ мубодилаи афкор намуданд.

Гуфта шуд, ки Ҷумҳурии Корея дар самти татбиқи технологияҳои пешрафтаи обуҳавошиносӣ, системаҳои худкори мушоҳидавӣ ва идоракунии маълумоти обуҳавошиносӣ таҷрибаи ғанӣ дорад. Омӯзиш ва истифодаи ин таҷриба метавонад ба рушди минбаъдаи соҳаи обуҳавошиносии Ҷумҳурии Тоҷикистон, баланд бардоштани сифати мушоҳидаҳо ва такмили хизматрасониҳои обуҳавошиносӣ мусоидат намояд.

Ҳамчунин таъкид гардид, ки дар шароити тағйирёбии иқлим ва афзоиши басомади падидаҳои хавфноки табиӣ, рушди шабакаҳои мушоҳидавӣ, такмили низоми ҷамъоварӣ ва интиқоли маълумот, рақамикунонии равандҳо ва ҷорӣ намудани технологияҳои инноватсионӣ аз самтҳои афзалиятноки фаъолияти соҳа ба шумор мераванд.

Ҳамкорӣ бо ҷониби Ҷумҳурии Корея барои тавсеаи мубодилаи таҷриба, рушди иқтидори техникӣ ва кадрии соҳаи обуҳавошиносии ҷумҳурӣ заминаи мусоид фароҳам оварда, ҳамчун қадами муҳим дар ин самт арзёбӣ мегардад.

АКС: Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон