Шурои Гурӯҳи Бонки ҷаҳонӣ марҳилаи дуюми маблағгузории грантии НБО «Роғун»-ро тасдиқ намуд

ДУШАНБЕ, 30.06.2026 /АМИТ «Ховар»/. Шурои Гурӯҳи Бонки ҷаҳонӣ имрӯз қарори навбатиро оид ба ҷудо намудани марҳилаи дуюми маблағгузорӣ барои татбиқи лоиҳаи сохтмони Неругоҳи барқи обии «Роғун» ба маблағи 300 миллион доллари амрикоӣ дар шакли грант тасдиқ намуд.

Тавре Намояндаи Ҷумҳурии Тоҷикистон дар Бонки ҷаҳонӣ ва Хазинаи байналмилалии асъор Пайрав Амирзода хабар дод, ҷониби Тоҷикистон ба роҳбарияти Бонки ҷаҳонӣ барои дастгирии пайваста ва талошҳои созанда дар пешбурди яке аз муҳимтарин лоиҳаҳои стратегии мамлакат ва минтақаи Осиёи Марказӣ изҳори сипос намуд.

Таъкид гардид, ки лоиҳаи Неругоҳи барқи обии «Роғун» дар меҳвари сиёсати рушди дарозмуддати Тоҷикистон қарор дошта, барои таъмини рушди устувори иқтисодӣ, таҳкими суботи молиявӣ ва таъсиси ҷойҳои нави корӣ аҳамияти калидӣ дорад. Ҳамзамон татбиқи он ба такмили идоракунӣ дар бахши энергетика, таҳкими ҳамкории тиҷоратӣ ва ҷалби шарикони рушд дар доираи барномаи марҳилавии сармоягузорӣ мусоидат менамояд.

Иттилоъ дода шуд, ки пас аз пурра мавриди истифода қарор гирифтани неругоҳ низоми энергетикии мамлакат ба таври куллӣ беҳтар гардида, норасоии мавсимии неруи барқ аз байн хоҳад рафт ва эътимоднокии таъминоти барқ афзоиш меёбад. Ҳамчунин лоиҳа дар таҳкими устувории Тоҷикистон ба таъсири тағйирёбии иқлим нақши муҳим хоҳад гузошт.

Иброз гардид, ки татбиқи лоиҳа барои рушди саноат, баланд бардоштани ҳосилнокии иқтисодиёт, диверсификатсияи истеҳсолот ва таъсиси даҳҳо ҳазор ҷойи нави корӣ дар давраи сохтмон ва баъд аз он заминаи мусоид фароҳам меорад. Манфиатҳои дарозмуддати он бахшҳои истеҳсолот, кишоварзӣ ва хизматрасониҳои рақамиро низ фаро хоҳад гирифт.

Ҳамчунин таъкид гардид, ки Неругоҳи барқи обии «Роғун» барои таҳкими ҳамкории минтақавӣ ва амнияти энергетикии кишварҳои Осиёи Марказӣ низ аҳамияти стратегӣ дошта, содироти неруи барқи аз ҷиҳати экологӣ тоза истеҳсолшаванда ба рушди бозори минтақавии неруи барқ ва коҳиши вобастагӣ аз манбаъҳои сӯзишвории истихроҷшаванда мусоидат хоҳад кард.

Гуфта шуд, ки марҳилаи нави маблағгузорӣ ба Стратегияи миллии рушди Ҷумҳурии Тоҷикистон ва Чаҳорчӯбаи ҳамкории кишварӣ бо Гурӯҳи Бонки ҷаҳонӣ пурра мутобиқ буда, ҷонибҳо омодагии худро барои идомаи ҳамкории самаранок ва татбиқи муваффақонаи лоиҳаи «Роғун» иброз намуданд.