Таваҷҷуҳи сайёҳон ба Тоҷикистон зиёдтар шудааст

ДУШАНБЕ, 15.06.2026 /АМИТ «Ховар»/. Аз моҳи январ то апрели соли равон ба Тоҷикистон 439,4 ҳазор шаҳрванди хориҷӣ ворид гардидааст, ки ин нишондиҳанда нисбат ба ҳамин давраи соли 2025 70,7 ҳазор нафар ё 19,2 зиёд мебошад. Аз шумораи умуми шаҳрвандони хориҷӣ 371,3 ҳазор нафарашон ба ҳайси сайёҳ (тибқи методологияи Созмони ҷаҳонии сайёҳӣ) ворид шудаанд, ки нисбат ба ҳамин давраи соли 2025 20,9 фоиз зиёд мебошад. Дар ин хусус ба АМИТ «Ховар» аз Агентии омори назди Президенти Ҷумҳурии Тоҷикистон хабар доданд.

Шумораи сайёҳони ба ҷумҳурӣ воридшуда аз Русия 104,7 ҳазор нафар, Узбекистон 247,1 ё 56,2 фоиз, Қирғизистон 40 ҳазор нафар, Қазоқистон 10,7 ҳазор нафар ва Туркманистон 1,9 ҳазор нафарро ташкил медиҳад.

Тибқи маълумоти Агентии омор, дар соли 2025 шумораи умумии шаҳрвандони хориҷие, ки бо назардошти тамоми намудҳои сафар ба Ҷумҳурии Тоҷикистон ташриф овардаанд, 2 миллиону 104,7 ҳазор нафарро ташкил дод. Аз ин шумора, 1 миллиону 784,4 ҳазор нафар ҳамчун сайёҳ ба ҷумҳурӣ омадааст. Аз ин теъдод, 1 миллиону 634,5 ҳазор нафар ба давлатҳои Итиҳоди Давлатҳои Мустақил ва 149,9 ҳазор нафар ба давлатҳои хориҷи дур рост меоянд. Бештари сайёҳон шаҳрвандони Узбекистон, Русия, Қазоқистон ва Чин мебошанд.
Ҳиссаи соҳаи сайёҳӣ дар ММД кишвар тақрибан 5 дарсадро ташкил медиҳад ва ин рақам дар ҳоли афзоиш аст.

Бояд гуфт, ки дар Тоҷикистон барои афзудани теъдоди сайёҳон ба рушди инфрасохтори сайёҳӣ аҳамияти аввалиндараҷа дода мешавад. Тибқи иттилои Кумитаи рушди сайёҳӣ, соли 2025 дар ҷумҳурӣ 367 субъекти хидматрасонии сайёҳӣ фаъолият намудааст, ки нисбат ба соли 2024 20-то зиёд мебошад.

Дар ҷумҳурӣ «Стратегияи рушди сайёҳӣ дар Ҷумҳурии Тоҷикистон барои давраи то соли 2030» амал мекунад, ки ба афзоиши шумораи сайёҳон ва рушди соҳа мусоидат менамояд.

АКС аз манбаъҳои боз