250 кӯдак дар «Чангоб» ба истироҳат фаро гирифта шуданд

ҲИСОР, 04.07.2026 /АМИТ «Ховар»/. 250 нафар кӯдакону наврасон, аз ҷумла ятимону маъюбони мактаб — интернатҳои ҷумҳуриявии ноҳияҳои Ёвону Рӯдакӣ ва шаҳри Ҳисор дар басти якуми истироҳатгоҳи маърифатӣ ва фароғатии «Чангоб» — шаҳри Ҳисор ба истироҳат ҷалб гардиданд. Дар ин хусус директори мавсимии истироҳатгоҳи «Чангоб» Гулмаҳмад Назарзода ба хабарнигори минтақавии АМИТ «Ховар» иттилоъ дод.

Кӯдакону наврасон дар истироҳатгоҳи «Чангоб» дар як баст 12 рӯз истироҳат менамоянд. Барои ҳар нафари онҳо аз ҳисоби иттифоқҳои касабаи соҳаҳои гуногуни ҷумҳурӣ маблағгузорӣ мешавад. Онҳо бо чор вақт хӯроки гарм таъмин буда, пайваста зери назорати табибону омӯзгорон қарор доранд.

Барои кӯдакон тамоми имкониятҳо барои истироҳати хуш, рушди зеҳнӣ, омӯзиши малакаҳои нави ҳаётӣ ва баргузории чорабиниҳои фарҳангӣ, варзишӣ ва таълимӣ муҳайё гардидааст. Бехатарии онҳо ҳангоми варзиш, оббозӣ ва дигар машғулиятҳо пурра таъмин карда шуда, ҳамзамон истироҳатгоҳ таҳти назорати доимии кормандони Маркази назорати давлатию санитарӣ ва эпидемиологии шаҳри Ҳисор қарор дорад.

Тарбиятгирандаи Мактаб-интернати ҷумҳуриявии кӯдакони ятими ноҳияи Ёвон, ғолиби Озмуни ҷумҳуриявии «Фурӯғи субҳи доноӣ китоб аст» Шаҳзода Холиқова иброз дошт, ки мо ятимон ҳамеша аз ғамхориҳои Пешвои миллат муҳтарам Эмомалӣ Раҳмон бархурдорем ва соли дуюм аст, ки ман дар ин мавзеи хушбоду ҳаво ба истироҳатгоҳ ҷалб мегардам.

«Барои ман ифтихор аст, ки давоми 12 рӯз бо духтарони манотиқи гуногуни ҷумҳурӣ истироҳат намуда, бо онҳо робитаи дӯстӣ пайдо мекунем. Бояд гуфт, ки роҳбарияти истироҳатгоҳ ва омӯзгорону табибон бо муомилаи хубу хизматрасонии беҳатарин мо ятимонро хурсанд мегардонанд», — афзуд ӯ.

Тавре масъулини истироҳатгоҳи «Чангоб» баён доштанд, имсол истироҳатгоҳ дар се баст фаъолият менамояд. Дар мавриди пайдо шудани сарчашмаҳои маблағгузорӣ ва ҷалби кӯдакон ба истироҳат, истироҳатгоҳ метавонад дар басти 4 ҳам фаъолият намояд.

Мурабияи истироҳатгоҳи «Чангоб» Нозанин Рустамзода гуфт, ки истироҳатгоҳи маърифатию фароғатии «Чангоб», ки дар деҳаи Чангоби Ҷамоати деҳоти Хонақоҳи Кӯҳии шаҳри Ҳисор воқеъ аст, солҳои 60-уми замони Шуравӣ бунёд гардида, бо номи «Айболит» фаъолият мекард ва ҳазорон мактаббачаро ба истироҳат фаро мегирифт.

Айни замон истироҳатгоҳ бо бунгоҳи тиббӣ, ҳавзи шиноварӣ, майдончаҳои варзишӣ, ошхона ва хобгоҳҳои барҳаво таъмин мебошад. Дар ин макони фароғатӣ мураббияҳо аз рӯйи барномаи таълимию фароғатии истироҳатгоҳ барои баланд бардоштани зеҳнияти ҷаҳонбинии кӯдакон фаъолияти пурсамар намуда, онҳоро ба ватандӯстию худшиносии миллӣ роҳнамоӣ менамоянд.

Субҳониддини МАҲМУД,
АМИТ «Ховар»

АКС: АМИТ «Ховар»