35-СОЛАГИИ ИСТИҚЛОЛИ ДАВЛАТӢ. Дар Ёвон иншооти нави соҳаи тандурустӣ ва коргоҳи истеҳсолӣ ба истифода дода шуд

ДУШАНБЕ, 25.07.2026 /АМИТ «Ховар»/. 24 июл дар ноҳияи Ёвон се иншооти нави соҳаи тандурустӣ ва як коргоҳи истеҳсолӣ мавриди истифода қарор гирифт. Дар ин хусус ба АМИТ «Ховар» аз Мақомоти иҷроияи ҳокимияти давлатии ноҳияи Ёвон хабар доданд.

Дар деҳоти Чоргул бунгоҳи тиббии деҳаи навбунёди Гулафшон-3 ва дар деҳоти Норин бинои нави Маркази саломатии деҳоти «Якуми Май» ифтитоҳ гардид.

Зимни ифтитоҳи иншоот, ки бо иштироки Раиси вилояти Хатлон Давлаталӣ Саид ва Раиси ноҳияи Ёвон Икромиддин Вализода баргузор гардид, иттилоъ дода шуд, ки бунгоҳи тиббии Гулафшон-3 аз се утоқи корӣ иборат буда, барои фаъолияти панҷ корманди соҳаи тандурустӣ пешбинӣ шудааст. Маркази саломатии деҳоти «Якуми Май» аз ҳашт утоқи корӣ иборат буда, бо таҷҳизоти муосири тиббӣ таъмин гардидааст. Бо мавриди истифода қарор гирифтани он барои ҳашт нафар ҷойи нави кор таъсис дода шуд.

Таъкид гардид, ки ҳар ду муассисаи тиббӣ бо дастгирии соҳибкорон ва сокинони маҳаллӣ бунёд гардида, таҷҳизоти маркази саломатӣ бо саҳми шарикони рушд дастрас шудааст.

Ифтитоҳи ин иншоот ба беҳтар намудани дастрасии аҳолӣ ба хизматрасониҳои босифати тиббӣ мусоидат хоҳад кард.

Ҳамчунин дар ноҳияи Ёвон маркази ташхисию табобатии хусусии «Умеди солим» ба фаъолият оғоз намуд. Марказ бо таҷҳизоти муосир таъмин буда, дар он хизматрасониҳои стоматологӣ, ташхиси ултрасадоӣ (УЗИ), ташхиси рентгенӣ, физиотерапия, масҳ ва дигар намудҳои хизматрасониҳои тиббӣ ба роҳ монда шудаанд.

Ба иттилои масъулон, фаъолияти марказ имкон медиҳад, ки сокинони ноҳия ва маҳалҳои атроф бе сафар ба дигар шаҳру ноҳияҳо аз хизматрасонии муосири ташхисию табобатӣ истифода баранд.

Ҳамчунин дар деҳаи Зафар коргоҳи истеҳсоли маҳсулоти қаннодии «Шириниҳои Марям» ифтитоҳ шуд. Коргоҳ бо ташаббуси соҳибкорзани маҳаллӣ Фарзона Нуралиева бунёд гардида, ба истеҳсоли навъҳои гуногуни маҳсулоти қаннодӣ машғул хоҳад шуд.

Бо оғози фаъолияти коргоҳ барои 10 нафар занони хонанишин ҷойи кори доимӣ таъсис дода шуд.

Иброз гардид, ки рушди чунин коргоҳҳо барои дастгирии соҳибкории занон, афзоиши истеҳсолоти ватанӣ ва таъмини бозори дохилӣ бо маҳсулоти босифат аҳамияти муҳим дорад.

«Ифтитоҳи ин иншоот дар доираи омодагӣ ба ҷашни 35-солагии Истиқлоли давлатии Ҷумҳурии Тоҷикистон амалӣ гардида, ба рушди инфрасохтори иҷтимоӣ, беҳтар гардидани сатҳи хизматрасонии тиббӣ ва таъсиси ҷойи нави кор мусоидат мекунад», — шарҳ доданд аз Мақомоти иҷроияи ҳокимияти давлатии ноҳияи Ёвон.

АКС: Мақомоти иҷроияи ҳокимияти давлатии ноҳияи Ёвон