Афзалияти рушди устувори Тоҷикистон дар чорабинии сатҳи баланди ECOSOC муаррифӣ гардид

ДУШАНБЕ, 18.07.2026 /АМИТ «Ховар»/. 16 июл Вазири рушди иқтисод ва савдои Ҷумҳурии Тоҷикистон Абдураҳмон Абдураҳмонзода дар шаҳри Ню-Йорк дар чорабинии сатҳи баланди Шурои иқтисодӣ ва иҷтимоии Созмони Милали Муттаҳид (ECOSOC) таҳти унвони «Роҳ ба сӯи соли 2030» иштирок намуд. Дар ин хусус ба АМИТ «Ховар» аз Вазорати рушди иқтисод ва савдои Ҷумҳурии Тоҷикистон хабар доданд.

Зимни суханронӣ Абдураҳмон Абдураҳмонзода иброз дошт, ки Ҷумҳурии Тоҷикистон татбиқи Ҳадафҳои рушди устуворро дар доираи «Барномаи миёнамуҳлати рушди Ҷумҳурии Тоҷикистон барои солҳои 2026–2030», ки марҳилаи сеюми амалисозии «Стратегияи миллии рушди Ҷумҳурии Тоҷикистон барои давраи то соли 2030» мебошад, идома медиҳад.

Таъкид гардид, ки самтҳои афзалиятноки рушди кишвар рушди фарогири иқтисодӣ, саноатикунонии босуръат, иқтисоди «сабз», рақамикунонӣ, рушди сармояи инсонӣ ва истифодаи самараноку устувори захираҳои табиӣ ба шумор мераванд.

Вазири рушди иқтисод ва савдо ҳамчунин пешниҳод намуд, ки Саммити Ҳадафҳои рушди устувори соли 2027 ба ҷалби сармоягузорӣ, тавсеаи дастрасӣ ба маблағгузорӣ, технология ва навоварӣ, инчунин таҳкими дастгирии кишварҳои рӯ ба тараққӣ, бахусус кишварҳои кӯҳӣ ва маҳсур дар хушкӣ равона карда шавад.

АКС: Вазорати рушди иқтисод ва савдои Ҷумҳурии Тоҷикистон