Ҷаласаи Комиссияи сетарафаи танзими муносибатҳои иҷтимоию меҳнатӣ дар Ҷумҳурии Тоҷикистон баргузор шуд

ДУШАНБЕ, 24.07.2026 /АМИТ «Ховар»/. Имрӯз дар Вазорати меҳнат, муҳоҷират ва шуғли аҳолии Ҷумҳурии Тоҷикистон ҷаласаи навбатии Комиссияи сетарафаи танзими муносибатҳои иҷтимоию меҳнатӣ дар Ҷумҳурии Тоҷикистон доир шуд.

Тавре ба АМИТ «Ховар» аз ин вазорат хабар доданд, ҷаласа таҳти раёсати муовини Сарвазири Ҷумҳурии Тоҷикистон Дилрабо Мансурӣ бо иштироки намояндагони вазорату идораҳои ҷумҳуриявӣ, мақомоти иҷроияи маҳаллии ҳокимияти давлатӣ, Федератсияи иттифоқҳои касабаи мустақили Тоҷикистон, Иттиҳодияи корфармоёни Ҷумҳурии Тоҷикистон ва дигар шарикони иҷтимоӣ гузаронида шуд.

Дар ҷаласа масъалаи ҷараёни иҷрои нақшаи чорабиниҳо оид ба татбиқи «Созишномаи генералӣ байни Ҳукумати Ҷумҳурии Тоҷикистон, Федератсияи иттифоқҳои касабаи мустақили Тоҷикистон ва Иттиҳодияи корфармоёни Ҷумҳурии Тоҷикистон барои солҳои 2024–2026 дар нимсолаи якуми соли 2026» баррасӣ гардид.

Зимни ҷаласа Вазири меҳнат, муҳоҷират ва шуғли аҳолии Ҷумҳурии Тоҷикистон Солеҳа Холмаҳмадзода оид ба натиҷаҳои татбиқи нақшаи чорабиниҳои созишнома дар нимсолаи якуми соли 2026 доир ба иҷрои уҳдадориҳои пешбинишудаи тарафҳо, тадбирҳои амалигардида дар самти ҳифзи ҳуқуқҳои иҷтимоию меҳнатии шаҳрвандон, рушди шуғли аҳолӣ, беҳтар намудани шароити меҳнат ва густариши ҳамкории иҷтимоӣ сухан гуфт.

Инчунин аз ҷониби шарикони иҷтимоӣ гузоришҳо оид ба саҳми сохторҳои намояндагии кормандон ва корфармоён дар татбиқи Созишномаи генералӣ, ҳалли масъалаҳои иҷтимоию меҳнатӣ ва таҳкими муколамаи иҷтимоӣ пешниҳод гардиданд.

Иштирокчиёни ҷаласа масъалаҳои муҳими соҳаи меҳнат, аз ҷумла сари вақт пардохт шудани музди меҳнат, беҳтар намудани ҳифзи иҷтимоии кормандон, такмили шартномаҳои коллективӣ ва иҷрои уҳдадориҳои вазорату идораҳоро баррасӣ карданд. Ҳамчунин ба масъалаи тақвияти ҳамкории байни давлат, иттифоқҳои касаба ва корфармоён таваҷҷуҳи махсус зоҳир гардид.

Дар натиҷаи баррасии масъалаҳо ба вазорату идораҳо, мақомоти иҷроияи маҳаллии ҳокимияти давлатӣ ва  шарикони иҷтимоӣ вазифаҳои мушаххас дода шуд. Комиссия аз рӯи натиҷаи ҷаласа қарори дахлдор қабул намуд.

Таъкид шуд, ки иҷрои босифати созишномаи генералӣ ва тақвияти ҳамкории сеҷонибаи давлат, иттифоқҳои касаба ва корфармоён барои таъмини суботи иҷтимоӣ, рушди муносибатҳои меҳнатӣ ва ҳифзи ҳуқуқу манфиатҳои кормандон аҳаммияти муҳим дошта, иҷрои қарорҳои қабулгардида таҳти назорати доимӣ қарор мегирад.

АКС: Вазорати меҳнат, муҳоҷират ва шуғли аҳолии Ҷумҳурии Тоҷикистон