Ҳамкории Тоҷикистону Муғулистон дар самти таҳқиқоти геологӣ таҳким меёбад

ДУШАНБЕ, 21.07.2026 /АМИТ «Ховар»/. Имрӯз пас аз анҷоми мулоқоту музокироти сатҳи олӣ байни Тоҷикистон ва Муғулистон маросими табодули санадҳои нави ҳамкорӣ баргузор гардид. Дар ҳузур ва бо иштироки Президенти Ҷумҳурии Тоҷикистон муҳтарам Эмомалӣ Раҳмон ва Президенти Муғулистон муҳтарам Ухнаагийн Хурэлсух 12 санад, аз ҷумла Ёддошти тафоҳум байни Саридораи геологияи назди Ҳукумати Ҷумҳурии Тоҷикистон ва Хадамоти миллии геологияи Муғулистон оид ба ҳамкорӣ дар соҳаи таҳқиқоти геологӣ табодул карда шуд.

Маркази матбуоти Саридораи геология ба имзо расидани ин Ёддошти тафоҳумро қадами муҳим дар густариши ҳамкории ду кишвар дар соҳаи геология арзёбӣ намуда, иттилоъ дод, ин санад барои мубодилаи таҷриба, татбиқи технологияҳои нав, гузаронидани таҳқиқоти муштараки геологӣ, омӯзиши захираҳои маъданӣ ва омода намудани мутахассисон замина фароҳам меорад.
Ҳамчунин, он метавонад ба ҷалби сармоягузорӣ ва истифодаи самараноки сарватҳои зеризаминии ҳар ду кишвар мусоидат намояд.

Имзои Ёддошти тафоҳум нишонаи таҳкими муносибатҳои дӯстона ва тавсеаи ҳамкории судманд байни Тоҷикистон ва Муғулистон дар самти геология ва истифодаи оқилонаи захираҳои табиӣ мебошад.

АКС: АМИТ “Ховар”