Аз Тоҷикистон 3,7 миллион дона тухм, 324,3 ҳазор сар чӯҷа ва 360 оилаи занбӯри асал содирот гардид

ДУШАНБЕ, 10.07.2026 /АМИТ «Ховар»/. Дар 6 моҳи соли равон рушди содирот дар бахши чорводорӣ ва парандапарварӣ назаррас буда, дар ин давра 3,7 миллион дона тухм, 324,3 ҳазор сар чӯҷа, 360 оилаи занбӯри асал ва 33 тонна моҳӣ ба хориҷи кишвар интиқол дода шуд, хабар доданд 9 июл зимни нишасти матбуотии Вазорати кишоварзиии Ҷумҳурии Тоҷикистон.

«Дар баробари таъминоти бозори истеъмолии мамлакат бо маҳсулоти худӣ, тибқи маълумоти гумрукӣ, дар 6 моҳи соли 2026 аз ҷумҳурӣ 74,3 ҳазор тонна маҳсулоти кишоварзӣ ба маблағи 39,9 миллион доллари ИМА содирот карда шудааст. Маҳсулоти кишоварзӣ ба 21 давлати дуру наздик роҳ ёфта, 89 фоизи он ба кишварҳои ИДМ ва 11 фоиз ба давлатҳои хориҷи дур рост меояд»,-гуфта шуд дар нишаст.

Маҳсулоти кишоварзии содиротшуда, аз ҷумла сабзавот 21,8 ҳазор тонна, меваҷоти тару тоза 10,6 ҳазор тонна, меваи хушк 39,9 ҳазор тонна, чормағзмева 746 тонна, полизӣ 102 тонна, моҳӣ 33 тонна ва дигар маҳсулоти кишоварзӣ 822 тоннаро ташкил медиҳанд.