Бахшида ба Рӯзи байналмилалии кооператсия дар Донишгоҳи давлатии тиҷорати Тоҷикистон ҳамоиши илмӣ баргузор гардид

ДУШАНБЕ, 04.07.2026 /АМИТ «Ховар»/. Бахшида ба Рӯзи байналмилалии кооператсия, ки ҳамасола шанбеи якуми моҳи июл таҷлил мегардад, дар Донишгоҳи давлатии тиҷорати Тоҷикистон дар мавзуи «Кооператсияи матлубот ва рушди он дар Тоҷикистон» ҳамоиши илмӣ баргузор гардид. Дар ин хусус АМИТ «Ховар» бо истинод ба Донишгоҳи давлатии тиҷорати Тоҷикистон иттилоъ медиҳад.

Ректори донишгоҳ Хайрулло Назарзода оид ба нақш ва саҳми кооператсияи матлубот дар рушди иқтисодиёти мамлакат ва баланд бардоштани сатҳу сифати зиндагии мардум сухан намуд.

Изҳор гардид, ки мутобиқи Эъломияи Маҷмаи кулли Созмони Милали Муттаҳид аз 16 декабри соли 1992 ва муқаррароти Алянси байналмилалии кооперативӣ дар тамоми ҷаҳон шанбеи аввали моҳи июл Рӯзи байналмилалии кооператсия ҷашн гирифта мешавад. Имсол иди касбии кормандони соҳаи кооператсияи матлубот ба 4 июл рост меояд.

Кооператсияи матлуботи Тоҷикистон ташкилоти ғайридавлатӣ, ҷамъиятию хоҷагӣ ва қисми таркибии кооператсияи ҷаҳонӣ буда, дар ҳаёти иқтисодӣ, иҷтимоӣ ва фарҳангии мамлакат нақшу мақоми намоён дорад.

Таъкид гардид, ки Ҷумҳурии Тоҷикистон узви Алянси байналмилалии кооперативӣ ва Лигаи иттифоқҳои кооператсияи матлуботи мамлакатҳои Иттиҳоди Давлатҳои Мустақил мебошад, ки рисолати асосии он рушди ҳамкории тиҷоратию иқтисодӣ байни иттифоқхои кооператсияи матлуботи мамлакатҳои аъзо ва тайёр кардани кадрҳои баландихтисос дар ин соҳа мебошад.

Гуфта шуд, ки барои фаъолияти босуботи кооператсияи матлуботи мамлакат, дастгирӣ ва ғамхориҳои бевоситаи Президенти Ҷумҳурии Тоҷикистон муҳтарам Эмомалӣ Раҳмон мусоидат намуд. Аз ҷумла, Қарори Ҳукумати Ҷумҳурии Тоҷикистон аз 18 майи соли 1998, «Дар бораи тадбирҳои барқарор намудан ва инкишоф додани фаъолияти савдо, захиракунӣ ва истеҳсолии Иттифоқи Тоҷикматлубот» ва Қарори Ҳукумати Ҷумҳурии Тоҷикистон аз 22 сентябри соли 2000 «Дар бораи дастгирии давлатии кооператсияи истеъмолкунандагон» қабул гардиданд, ки ин худ як дастгирии давлатии низоми кооператсияи матлуботи мамлакат мебошад. Баъди ба даст овардани истиқлолияти давлатӣ Тоҷикматлубот барои рушди иқтисодию иҷтимоии ҷумҳурӣ ва баланд бардоштани сатҳи зиндагии аҳолӣ саҳми беназир гузошта истодааст.

Дар ҳамоиш таъкид гардид, ки фаъолияти беш аз 100 солаи соҳаи кооператсияи матлуботи мамлакат бозгӯи он аст, ки низоми кооператсияи матлубот дар рушди иқтисодӣ, иҷтимоӣ ва фарҳангии ҷумҳурӣ, беҳтар гардонидани сатҳу сифати зиндагии мардум ва ободию шукуфоии мамлакат саҳми босазо дорад.

АКС: Донишгоҳи давлатии тиҷорати Тоҷикистон