Бартарафсозии оқибатҳои сел дар Рӯшон таҳти назорати Ҳукумати Тоҷикистон қарор дорад
ДУШАНБЕ, 22.07.2026 /АМИТ «Ховар»/. 20 июл дар натиҷаи фаромадани сел ба деҳаҳои Баррӯшон ва Деҳрӯшони ноҳияи Рӯшони Вилояти Мухтори Кӯҳистони Бадахшон 40 манзили истиқоматии шаҳрвандон зарар дидааст. Дар ин хусус ба АМИТ «Ховар» аз Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон хабар доданд.
Бар асари баланд шудани ҳарорати ҳаво ва об шудани барфу пиряхҳои баландкӯҳ дар деҳаи Баррӯшон сел ҷорӣ шуда, ба манзилҳои истиқоматии шаҳрвандон зарар расонид. Ҳамон рӯз дар деҳаи Деҳрӯшони Ҷамоати деҳоти Назаршоҳ Додихудоев низ сел ба хонаҳои истиқоматӣ, заминҳои кишоварзӣ, майдончаи варзишӣ, кӯчаҳо ва роҳравҳо хисорот ворид намуд.
Тибқи маълумоти пешакии кумита, дар деҳаи Баррӯшон 10 хона пурра, 6 хона қисман ва 14 хона сабук осеб дидааст. Дар деҳаи Деҳрӯшон 4 хона қисман ва 6 хона сабук зарар дидааст. Дар маҷмуъ, аз офати табиӣ 198 нафар аъзои оилаҳо зарар дидаанд.
Аз ҷониби кумита ба минтақаҳои зарардида гурӯҳи корӣ ва техникаҳои махсус равона гардида, Комиссияи ҳолатҳои фавқулодаи вилоят якҷо бо мутахассисони кумита баҳогузории пешакии хисоротро анҷом дода истодаанд. Барои бартараф намудани оқибатҳои офати табиӣ дар минтақаҳои зарардидаи ноҳия 3 боркунаки фронталӣ ва 2 техникаи экскаватор ба корҳои барқарорсозӣ ҷалб гардидаанд.
Ҳамзамон оид ба бартараф намудани оқибатҳои офати табиӣ дар Вилояти Мухтори Кӯҳистони Бадахшон таҳти раёсати раиси вилоят Шарифхон Сафарзода ҷаласа баргузор гардид. Дар ҷаласа таъкид шуд, ки хонаҳои сокинони аз офати табиӣ зарардида бо дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон пурра барқарор карда мешаванд. То анҷоми корҳои сохтмонӣ соҳибони онҳо ба идораю муассисаҳои вилоятӣ ва ноҳияи Рӯшон вобаст карда шуданд.
Дар асоси дастуру супоришҳои Сарвари давлат масъулин вазифадор гардиданд, ки дар муҳлати як моҳ барои зарардидагон хонаи истиқоматӣ бунёд намоянд.
Дар айни замон дар минтақаҳои зарардида тоза намудани маҷрои сел, барқарорсозии роҳҳо ва дигар иншооти инфрасохторӣ идома дошта, ҷараёни корҳои барқарорсозӣ таҳти назорати доимии мақомоти давлатӣ қарор дорад.
АКС: Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон
Масъалаи ҳифзи кӯдакон аз таъсири таблиғи ғизои носолим баррасӣ гардид
Дар вилояти Хатлон ғолибони Озмуни ҷумҳуриявии «Хушдомани беҳтарин» муайян гардиданд
Осори Мавлоно чун падидаи нодири адабиёт ва андешаи башарӣ то имрӯз аҳаммияти бузурги маънавию ахлоқӣ дорад
Доир ба нақши Мавлоно дар ташаккули фарҳанги сулҳ конференсияи илмӣ-амалӣ баргузор шуд
Рӯзи дуюми Форуми дуюми сулҳи Фарғона таҳти унвони «Ынтымак» (Рӯзи ягонагӣ) доир шуд
Оид ба мавқеи геосиёсӣ, геоиқтисодӣ ва геофарҳангии Шарқи Миёна ва Наздик конференсияи илмӣ доир шуд
Озмоишгоҳҳои таҳлили канданиҳои фоиданок ва омода кардани намунаи ашёи минералӣ ба истифода дода шуданд
Густариши ҳамкорӣ бо намояндагони Бонки исломии рушд дар соҳаи таҳсилоти касбӣ баррасӣ гардид
Дар Санкт-Петербург бо донишҷӯёни тоҷик оид ба масъалаҳои будубош ва таҳсил вохӯрӣ доир шуд
Дар шаҳри Гулистони вилояти Суғд Форуми дуюми сулҳи Фарғона доир шуд
Байни Маркази тадқиқоти стратегӣ ва Бунёди «Peace Nexus» Ёддошти тафоҳуми ҳамкорӣ ба имзо расонида шуд
ТАРЗИ ҲАЁТИ СОЛИМ. Пиёдагардӣ умри инсонро дароз ва баданро ҷавон мекунад
