Дар Данғара таҳти унвони «Ҷомеаи солим маҳсули оилаи солим аст» иқдоми маърифатӣ доир шуд

ДУШАНБЕ, 19.07.2026 /АМИТ «Ховар»/. Дар ноҳияи Данғара бо мақсади баланд бардоштани сатҳи маърифати иҷтимоӣ ва тиббии аҳолӣ, таҳкими арзишҳои оилавӣ ва тарғиби тарзи ҳаёти солим таҳти унвони «Ҷомеаи солим маҳсули оилаи солим аст» иқдоми тарғиботию маърифатӣ баргузор гардид. Дар ин хусус ба АМИТ «Ховар» аз Мақомоти иҷроияи ҳокимияти давлатии ин ноҳия хабар доданд.

Ҳадафи асосии иқдом баланд бардоштани маърифати аҳолӣ оид ба аҳамияти тарзи ҳаёти солим, таҳкими масъулияти шаҳрвандӣ дар ҳифзи саломатӣ, пешгирии бемориҳо, ҳифзи саломатии модару кӯдак ва фароҳам овардани муҳити солими оилавӣ арзёбӣ гардид.

Дар доираи иқдом масъулин бо сокинони ноҳия суҳбату вохӯриҳо баргузор намуда, оид ба нақши оила дар тарбияи насли солим, риояи қоидаҳои беҳдошти шахсӣ, ғизои дуруст, пешгирии бемориҳо ва дигар масъалаҳои оиладорӣ корҳои фаҳмондадиҳӣ гузарониданд.

Зимни вохӯриҳо ҳамчунин масъалаҳои пешгирии никоҳи хешутаборӣ, нигоҳубини саломатии занону кӯдакон, баланд бардоштани сатҳи огоҳии ҷавонон оид ба масъалаҳои муҳими иҷтимоӣ ва ташаккули тарзи ҳаёти солим мавриди таваҷҷуҳ қарор гирифтанд.

Иштирокчиён таъкид намуданд, ки солимии ҷомеа аз муҳити солими оила оғоз меёбад. Аз ин рӯ, баланд бардоштани маърифати тиббӣ ва ҳуқуқии шаҳрвандон, таҳкими масъулияти падару модарон ва тарғиби арзишҳои оилавӣ яке аз самтҳои муҳими корҳои иҷтимоӣ ба ҳисоб меравад.

АКС: Мақомоти иҷроияи ҳокимияти давлатии ноҳияи Данғара