Дар даври омӯзишии байналмилалӣ дар Италия масоили дипломатияи илмӣ ва ҳамкории байналмилалӣ баррасӣ мешаванд

ДУШАНБЕ, 22.07.2026 /АМИТ «Ховар»/. Аз 20 то 23 июл дар шаҳри Триести Ҷумҳурии Италия даври омӯзиши байналмилалии дипломатияи илмӣ доир мегардад, ки дар он аз Ҷумҳурии Тоҷикистон вакили Маҷлиси намояндагони Маҷлиси Олии Ҷумҳурии Тоҷикистон Сиёвуш Наботзода ва корманди Маркази омӯзиш ва татбиқи манбаъҳои барқароршавандаи энергияи Институти физикаю техникаи ба номи С. У. Умарови Академияи миллии илмҳои Тоҷикистон Ризои Баҳромзод иштирок доранд.

Тавре аз Маҷлиси намояндагони Маҷлиси Олии Ҷумҳурии Тоҷикистон ба АМИТ «Ховар» иттилоъ доданд, ин ҳамоиши сатҳи баланд барои табодули таҷриба, муаррифии имконияти илмии мамлакат, омӯзиши механизмҳои муосири дипломатияи илмӣ ва таҳкими робитаҳои байналмилалии илмӣ аҳамияти муҳим дорад.

Омӯзиши байналмилалӣ бо ташаббуси Академияи ҷаҳонии илмҳо (The World Academy of Sciences (TWAS)) дар ҳамкорӣ бо Ассотсиатсияи амрикоии пешрафти илм (The American Association for the Advancement of Science (AAAS)) доир гардид. Дар кори он намояндагони созмонҳои бонуфузи байналмилалии илмӣ, олимони шинохта, дипломатҳо, сиёсатмадорон ва мутахассисон аз давлатҳои гуногун иштирок доранд.

Дар доираи даври омӯзишӣ масъалаҳои нақши илм дар таҳкими муносибатҳои байналмилалӣ, истифодаи далелҳои илмӣ дар раванди қабули қарорҳои сиёсӣ, ҳамкории олимон бо дипломатҳо ва сиёсатмадорон, таъсири илм ба дипломатия ва нақши дипломатия дар рушди лоиҳаҳои бузурги илмӣ мавриди баррасӣ қарор мегиранд.

Ҳамчунин иштирокчиён масъалаҳои муҳими ҷаҳонӣ, аз ҷумла тағйирёбии иқлим, амнияти озуқаворӣ, ҳифзи гуногунии биологӣ, пешгирии савдои ғайриқонунии ҳайвоноти нодир, рушди биотехнология ва таҳкими ҳамкории байналмилалии илмиро муҳокима менамоянд.

АКС: Маҷлиси намояндагони Маҷлиси Олии Ҷумҳурии Тоҷикистон