Дар Душанбе ҷаласаи дуюми Шурои кории Тоҷикистону Туркманистон баргузор гардид
ДУШАНБЕ, 08.07.2026 /АМИТ «Ховар»/. 7 июл дар шаҳри Душанбе ҷаласаи дуюми Шурои кории Тоҷикистону Туркманистон баргузор гардид. Дар ин хусус АМИТ «Ховар» бо истинод ба Палатаи савдо ва саноати Ҷумҳурии Тоҷикистон хабар медиҳад.
Ҷаласа дар доираи татбиқи амалии тавофуқоти роҳбарони олии ҳарду давлат- Президенти Тоҷикистон муҳтарам Эмомалӣ Раҳмон ва Президенти Туркманистон муҳтарам Сердар Бердимуҳамедов доир шуда, таҳти ҳамраисии Раиси Палатаи савдо ва саноати Ҷумҳурии Тоҷикистон Фарҳодшоҳ Раҳмонализода ва Раиси Палатаи савдо ва саноати Туркманистон Мерген Гурдов баргузор шуд.
Аз ҷониби Тоҷикистон дар ҷаласа намояндагони вазоратҳои рушди иқтисод ва савдо, кишоварзӣ, саноат, кумитаҳои давлатии сармоягузорӣ ва идораи амволи давлатӣ, рушди сайёҳӣ, Хадамоти гумрук, роҳбарияти палатаҳои савдо ва саноати вилоятҳои Суғду Хатлон, инчунин доираҳои васеи бахши хусусии мамлакат, аз ҷумла аъзоёни палата иштирок намуданд.
Инчунин ҳайати беш аз 35-нафараи ваколатдори Туркманистон, ки намояндагони мақомоти давлатӣ ва доираи васеи бахши хусусӣ, аз қабили роҳбарият ва намояндагони 20 ширкату корхонаҳои пешсафи Туркманистонро дар бар мегирифт, иштирок намуданд.
Зимни ифтитоҳи ҷаласа Раиси Палатаи савдо ва саноати Ҷумҳурии Тоҷикистон Фарҳодшоҳ Раҳмонализода иброз намуд, ки бо шарофати сиёсати дурандешонаи сарони ду давлат имрӯз муносибатҳои дӯстона ва иқтисодии байни давлатҳо ба сатҳи нав баромада, заминаҳои мусоид барои воридоти сармояи калони хориҷӣ ва рушди бахши хусусӣ фароҳам омадаанд.
Фарҳодшоҳ Раҳмонализода оид ба фаъолияту дастовардҳои Палатаи савдо ва саноати Ҷумҳурии Тоҷикистон ва ҳолати кунунии ҳамкории иқтисодии дуҷониба сухан намуда, иброз дошт, ки сарфи назар аз тамоюли баланди рушди савдои дуҷониба, иқтидори зиёди истифоданашуда барои афзун намудани ҳаҷми он байни давлатҳо мавҷуд аст.
Мерген Гурдов таъкид намуд, ки корхонаҳои бузурги саноатӣ, кимиёвӣ ва логистикии Туркманистон барои таҳким бахшидани робитаҳои мустақим бо соҳибкорони тоҷик ва ба роҳ мондани лоиҳаҳои муштараки сармоягузорӣ дар қаламрави Ҷумҳурии Тоҷикистон ҳавасманд мебошанд.
Тибқи барномаи баргузории ҷаласа, намояндагони ҷумҳурии мо имкониятҳои сармоягузории Тоҷикистон, имтиёзҳои минтақаҳои озоди иқтисодӣ ва имкониятҳои соҳаи сайёҳиро ба таври муфассал тариқи рӯнамо муаррифӣ намуда, ҷониби Туркманистон низ тариқи рӯнамоҳои соҳавӣ иқтидори нақлиётиву логистикӣ ва сармоягузории давлати худро ба иштирокчиён пешниҳод намуданд.
Дар анҷоми ҷаласа байни доираҳои соҳибкории ду мамлакат вохӯриҳои мустақими самараноки B2B баргузор гардиданд.
Чорабиниҳои дар доираи ҷаласаи дувуми Шурои кории Тоҷикистону Туркманистон банақшагирифташуда идома доранд.
АКС: Палатаи савдо ва саноати Ҷумҳурии Тоҷикистон
Корхонаи коркарди пахтаи ноҳияи Фархор баъд аз таъмир ба истифода дода шуд
РӮЗИ ҶАҲОНИИ ПАХТА. Як килограмм нахи пахта дар бозори ҷаҳонӣ ба 16 килограмм гандум баробар аст
«БАРНОМАИ РУШДИ САЙЁҲИИ ДОХИЛӢ». Дар Тоҷикистон беш аз 400 захираи сайёҳӣ, 1000 дара, 1000 кӯл ва мавзеъҳои дигари ҷолиб мавҷуд аст
Дурнамои рушди соҳаи сохтмони Тоҷикистон дар форуми байналмилалӣ дар Екатеринбург муаррифӣ гардид
Лоиҳаи «Дастрасӣ ба бозорҳо ва мутобиқшавӣ барои чорводорӣ» татбиқ мегардад
Дар Конфронси C5+1 SI дастовардҳои Тоҷикистон дар самти рушди зеҳни сунъӣ муаррифӣ шуданд
Коршиносони БОР соҳаи нақлиёт ва логистикаро яке аз муҳаррикони рушди иқтисодиёт арзёбӣ менамоянд
Байни Тоҷикистон ва палатаҳои савдою саноати кишварҳои ИДМ густариши робитаҳои тиҷоратӣ баррасӣ гардид
Барои фурӯши неруи барқ тавассути истгоҳҳои пуркунии воситаҳои нақлиёти барқӣ талаботи нав амалӣ гардид
ИСТИҚЛОЛИЯТИ ДАВЛАТӢ. То 1 октябр дар шаҳри Кӯлоб 493 иншооти истеҳсолию иҷтимоӣ ба истифода дода шудааст
Дар Минтақаи озоди иқтисодии «Кӯлоб» бинои гузаргоҳи гумрукӣ ва чоҳи амудӣ ба истифода дода шуд
Истифодаи таҷрибаи байналмилалӣ дар самти рушди ҳудудҳои табиии махсус муҳофизатшаванда баррасӣ шуд
