Дар Душанбе ҷаласаи дуюми Шурои миллии об баргузор шуд

ДУШАНБЕ, 29.07.2026 /АМИТ «Ховар»/. Имрӯз дар шаҳри Душанбе таҳти раёсати муовини Сарвазири Ҷумҳурии Тоҷикистон, раиси Шурои миллии об Сулаймон Зиёзода ҷаласаи дуюми Шурои миллии об баргузор гардид, иттилоъ медиҳад АМИТ «Ховар» бо истинод ба Вазорати энергетика ва захираҳои оби Ҷумҳурии Тоҷикистон.

Дар ҷаласа Вазири энергетика ва захираҳои оби Ҷумҳурии Тоҷикистон, муовини раиси Шуро Далер Ҷумъа, аъзои Шуро ва намояндагони шарикони рушд иштирок намуданд.

Дар ҷаласаи навбатии Шуро масъалаҳои марбут ба натиҷаҳои татбиқи Нақшаи амали «Стратегияи миллии оби Ҷумҳурии Тоҷикистон барои давраи солҳои 2025-2027», натиҷаҳои татбиқи Нақшаи амали «Барномаи рушди беҳдошти замин ва обёрӣ барои давраи солҳои 2024-2026» ва лоиҳаи Нақшаи ҳавзавӣ оид ба захираҳои оби минтақаи ҳавзавии Кофарниҳон баррасӣ гардиданд.

Зимни баррасии масъалаҳо доир ба раванди татбиқи чорабиниҳои пешбинишуда, натиҷаҳои бадастомада ва вазифаҳои минбаъда барои таъмини истифодаи оқилона ва самараноки захираҳои обӣ, кам кардани талафоти об ва рушди инфрасохтори соҳа мубодилаи афкор доир шуд.

Дар анҷоми ҷаласа оид ба масъалаҳои баррасишуда қарорҳои дахлдор қабул гардида, барои идомаи татбиқи ҳадафҳои «Стратегияи миллии оби Ҷумҳурии Тоҷикистон барои давраи солҳои 2025-2027» ва дигар барномаҳои соҳавӣ вазифаҳои минбаъда муайян карда шуданд.

АКС: Вазорати энергетика ва захираҳои оби Ҷумҳурии Тоҷикистон