Дар Душанбе дар мавзуи «Сиёсисозии ислом ва хатари он ба амнияти сиёсӣ ва суботи ҷомеа» ҳамоиши илмӣ доир мегардад

ДУШАНБЕ, 01.07.2026 /АМИТ «Ховар»/. 3 июл дар Донишкадаи исломии Тоҷикистон ба номи Имоми Аъзам—Абуҳанифа Нуъмон ибни Собит бо ибтикори Маркази исломшиносӣ дар назди Президенти Ҷумҳурии Тоҷикистон таҳти унвони «Сиёсисозии ислом ва хатари он ба амнияти сиёсӣ ва суботи ҷомеа» ҳамоиши илмӣ–амалӣ баргузор мешавад. Дар ин хусус ба АМИТ «Ховар» аз ин марказ хабар доданд.

Дар кори ҳамоиш намояндагони масъули вазорату идораҳои давлатӣ,  олимону коршиносони ниҳодҳои илмӣ-таҳлилӣ иштирок менамоянд.

Зимни ҳамоиш масъалаҳои марбут ба мафҳум ва моҳияти сиёсисозии ислом, таҷрибаи таърихии он, муносибати дин ва сиёсат, хатари исломи сиёсӣ ба амнияти сиёсӣ, фарҳангӣ ва суботи ҷомеа, таъсири сиёсикунонии дин ба давлат ва ҳуқуқ, инчунин дурнамои муносибати давлати демократӣ ва миллӣ бо дин мавриди таҳлилу баррасӣ қарор дода мешаванд.

Ҳамчунин иштирокчиён масъалаҳои вобаста ба мушкилоти сиёсӣ ва иқтисодии олами ислом, омилҳои сиёсисозии мазҳаби ҳанафӣ ва ояндаи ислом дар шароити таҳаввулоти илмӣ ва фарҳангии ҷаҳони муосирро муҳокима хоҳанд кард.

АКС аз манбаъҳои боз