Дар Душанбе тавсеаи робитаҳои парлумонии Тоҷикистон ва Русия баррасӣ гардид

ДУШАНБЕ, 01.07.2026 /АМИТ «Ховар»/. 30 июн Раиси Кумитаи Маҷлиси намояндагони Маҷлиси Олии Ҷумҳурии Тоҷикистон оид ба корҳои байналмилалӣ, иттиҳодияҳои ҷамъиятӣ ва иттилоот Маҳмадшоҳ Гулзода бо Котиби генералии Конфедератсияи умумииттифоқии иттифоқҳои касаба, вакили Думаи давлатии Федератсияи Русия Виктор Пинский мулоқот намуд. Дар ин хусус ба АМИТ «Ховар» аз Маҷлиси намояндагон хабар доданд.

Дар мулоқот ҷонибҳо ҳолати кунунӣ ва дурнамои муносибатҳои Тоҷикистону Русияро мавриди баррасӣ қарор доданд.

Иброз гардид, ки ҳамкории ду давлат бар пояи шарикии стратегӣ ва иттифоқӣ, эҳтироми мутақобила, баробарҳуқуқӣ ва ба инобат гирифтани манфиатҳои ҳамдигар мунтазам рушд меёбад.

Парлумонҳои ҳар ду давлат дар таъмини заминаи ҳуқуқии татбиқи созишномаҳои дар сатҳи олӣ бадастомада нақши муҳим доранд ва густариши ҳамкории байнипарлумонӣ ба рушди минбаъдаи муносибатҳои дуҷониба мусоидат хоҳад намуд.

Инчунин зимни мулоқот масъалаҳои муҳоҷирати меҳнатӣ ва ҳифзи ҳуқуқу манфиатҳои иҷтимоии шаҳрвандони Тоҷикистон, ки дар Федератсияи Русия фаъолият доранд, аз мавзуъҳои меҳварӣ буданд.

Таъкид шуд, ки санадҳои нави баимзорасида дар ин самт заминаи ҳуқуқии ҳамкориро таҳким бахшида, ба такмили низоми танзими муҳоҷирати меҳнатӣ мусоидат менамоянд.

Ҳамзамон ҳамсуҳбатон аҳамияти идомаи ҳамкории мақомоти салоҳиятдори ду давлатро дар самти такмили механизмҳои муҳоҷират, таъмини шароити муносиби меҳнат, ҳифзи ҳуқуқҳои иҷтимоии муҳоҷирони меҳнатӣ ва назорати иҷрои созишномаҳои бадастомада таъкид карданд.

АКС: Маҷлиси намояндагони Маҷлиси Олии Ҷумҳурии Тоҷикистон