Дар Форуми сиёсии сатҳи баланд оид ба рушди устувори СММ мавқеи Тоҷикистон оид ба рушди устувор муаррифӣ шуд
ДУШАНБЕ, 15.08.2026 /АМИТ «Ховар»/. 14 июл дар қароргоҳи Созмони Милали Муттаҳид дар шаҳри Ню-Йорк Форуми сиёсии сатҳи баланд оид ба рушди устувор–2026 баргузор гардид, ки дар он аз Тоҷикистон Вазири рушди иқтисод ва савдои Ҷумҳурии Тоҷикистон Абдураҳмон Абдураҳмонзода иштирок ва суханронӣ намуд. Дар ин хусус ба АМИТ «Ховар» аз ин вазорат хабар доданд.
Абдураҳмон Абдураҳмонзода зимни форум изҳор дошт, ки Тоҷикистон таҳти роҳбарии хирадмандона ва дурандешонаи Президенти Ҷумҳурии Тоҷикистон муҳтарам Эмомалӣ Раҳмон давоми солҳои охир пайваста ташаббусҳои байналмилалиро дар соҳаи об дар чаҳорчӯби Созмони Милали Муттаҳид пешбарӣ намуда, дар ташаккули рӯзномаи ҷаҳонии об нақши муҳим дорад.
Аз ин рӯ дар Тоҷикистон барои суръат бахшидан ба татбиқи Ҳадафҳои рушди устувор тақвияти шарикии байналмилалӣ, таъмини маблағгузории устувору пешбинишаванда ва густариши ҳамкории байналмилалӣ аҳамияти калидӣ доранд.
Ҳамзамон дар доираи форум Вазири рушди иқтисод ва савдои Тоҷикистон бо мудири Барномаи рушди Созмони Милали Муттаҳид Александр Де Кро вохӯрӣ намуд.
Зимни вохӯрӣ ҷонибҳо масъалаи татбиқи «Барномаи миёнамуҳлати рушди Ҷумҳурии Тоҷикистон барои солҳои 2026–2030», маҳаллисозии Ҳадафҳои рушди устувор, маблағгузорӣ, рақамикунонии иқтисодиёт, иқтисоди «сабз», тағйирёбии иқлим ва ҳифзи пиряхҳоро баррасӣ намуданд.
Дар доираи форум Абдураҳмон Абдураҳмонзода бо мудири Дафтари Созмони Милали Муттаҳид оид ба ҳамкории Ҷануб-Ҷануб Дима Ал-Хатиб вохӯрӣ намуд.
Ҷонибҳо дар вохӯрӣ масъалаҳои идоракунии захираҳои об, мутобиқшавӣ ба тағйирёбии иқлим, ҳифзи пиряхҳо, иқтисоди «сабз» ва рушди устувори саноатиро барррасӣ намуданд.
Инчунин натиҷаҳои бадастомадаи Конфронси чоруми Душанбе оид ба татбиқи Даҳсолаи байналмилалии амал «Об барои рушди устувор, солҳои 2018–2028» ва чорабиниҳои канории конфронс мавриди муҳокима қарор дода шуданд.
Дар анҷоми мулоқот ҷонибҳо барои рушди ҳамкории мутақобили судманд дар самтҳои мавриди таваҷҷуҳи тарафайн ибрози омодагӣ намуданд.
АКС: Вазорати рушди иқтисод ва савдои Ҷумҳурии Тоҷикистон
РӮЗИ ҶАҲОНИИ ПАХТА. Як килограмм нахи пахта дар бозори ҷаҳонӣ ба 16 килограмм гандум баробар аст
«БАРНОМАИ РУШДИ САЙЁҲИИ ДОХИЛӢ». Дар Тоҷикистон беш аз 400 захираи сайёҳӣ, 1000 дара, 1000 кӯл ва мавзеъҳои дигари ҷолиб мавҷуд аст
Дурнамои рушди соҳаи сохтмони Тоҷикистон дар форуми байналмилалӣ дар Екатеринбург муаррифӣ гардид
Лоиҳаи «Дастрасӣ ба бозорҳо ва мутобиқшавӣ барои чорводорӣ» татбиқ мегардад
Дар Конфронси C5+1 SI дастовардҳои Тоҷикистон дар самти рушди зеҳни сунъӣ муаррифӣ шуданд
Коршиносони БОР соҳаи нақлиёт ва логистикаро яке аз муҳаррикони рушди иқтисодиёт арзёбӣ менамоянд
Байни Тоҷикистон ва палатаҳои савдою саноати кишварҳои ИДМ густариши робитаҳои тиҷоратӣ баррасӣ гардид
Барои фурӯши неруи барқ тавассути истгоҳҳои пуркунии воситаҳои нақлиёти барқӣ талаботи нав амалӣ гардид
ИСТИҚЛОЛИЯТИ ДАВЛАТӢ. То 1 октябр дар шаҳри Кӯлоб 493 иншооти истеҳсолию иҷтимоӣ ба истифода дода шудааст
Дар Минтақаи озоди иқтисодии «Кӯлоб» бинои гузаргоҳи гумрукӣ ва чоҳи амудӣ ба истифода дода шуд
Истифодаи таҷрибаи байналмилалӣ дар самти рушди ҳудудҳои табиии махсус муҳофизатшаванда баррасӣ шуд
Дар ноҳияи Дӯстӣ ҷамъоварии шолӣ оғоз гардид
