Дар Ишкошим ‎ зеристгоҳи барқии 110/35 кВ-и «Қозидеҳ» ба истифода дода мешавад

ДУШАНБЕ, 21.07.2026 /АМИТ «Ховар»/. Ояндаи наздик дар ноҳияи Ишкошими Вилояти Мухтори Кӯҳистони Бадахшон зеристгоҳи барқии 110/35 кВ-и «Қозидеҳ» ба истифода дода мешавад. Дар ин хусус АМИТ «Ховар» бо истинод ба Вазорати энергетика ва захираҳои оби Ҷумҳурии Тоҷикистон иттилоъ медиҳад.

Зимни шиносоии Вазири энергетика ва захираҳои оби Ҷумҳурии Тоҷикистон Далер Ҷумъа бо ҷараёни сохтмони зеристгоҳи барқии 110/35 кВ-и «Қозидеҳ» иттилоъ дода шуд, ки 95 фоизи корҳои сохтмонӣ дар зеристгоҳ ба анҷом расида, иншоот то охири моҳи июл ба истифода дода мешавад.

‎ Ёдовар мешавем, ки 26 июни соли 2025 аз ҷониби Президенти Ҷумҳурии Тоҷикистон муҳтарам Эмомалӣ Раҳмон ба корҳои сохтмони ин зеристгоҳи барқӣ оғози расмӣ бахшида шуд.

‎ Бунёди зеристгоҳи барқии 110/35 кВ-и «Қозидеҳ» дар самти таҳкими инфрасохтори энергетикии вилоят аҳамияти хосса дошта, ба баланд бардоштани эътимоднокӣ, устувории таъминоти неруи барқ ва коҳиши талафот дар минтақа мусоидат менамояд.‎

‎ Вазири энергетика ва захираҳои оби Ҷумҳурии Тоҷикистон Далер Ҷумъа ҳамзамон бо фаъолияти зеристгоҳи барқии 110/35/10 кВ-и «Ҷангал» шинос шуд.

АКС: Вазорати энергетика ва захираҳои оби Ҷумҳурии Тоҷикистон