Дар канори роҳи Душанбе–Чанок корҳои соҳилмустаҳкамкунӣ идома доранд

ДУШАНБЕ, 16.07.2026 /АМИТ «Ховар»/. Аз сабаби баландшавии сатҳи оби дарёҳое, ки дар канори роҳи Душанбе – Чанок ҷойгиранд, аз ҷониби ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон корҳои соҳилмустаҳкамкунӣ гузаронида мешаванд.

Тавре ба АМИТ «Ховар» аз ин ширкат хабар доданд, дар минтақаҳои Варзобу Зарафшони роҳи Душанбе–Чанок бинобар баланд шудани сатҳи оби дарёҳо баъзе қисматҳои роҳ зарари ҷиддӣ мебинанд. Инчунин ҷӯйборҳои канори роҳ пурсангу лой шуда, дар ҳолати сари вақт тоза накардани онҳо муҳлати истифодаи роҳ коҳиш меёбад.

Иттилоъ дода шуд, ки ҳамасола дар фаслҳои баҳору тобистон сатҳи оби ин дарёҳои канори роҳи Душанбе–Чанок баланд мешавад.

Дар айни замон дар қитъаҳои зиёди роҳи Душанбе–Чанок корҳои соҳилмустаҳкамкунӣ идома дошта, барои сари вақт ва дар муҳлати муайянгардида иҷро намудани он техникаҳои пуриқтидор истифода мегарданд.

АКС: Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон