Дар комплекси сайёҳии Шаҳристон — эко резорт ба масофаи зиёда аз 5 километр таноброҳ сохта мешавад

ДУШАНБЕ, 08.07.2026 /АМИТ «Ховар»/. Дар мавзеи Хуррамдараи ноҳияи Шаҳристон комплекси сайёҳии Шаҳристон — эко резорт бунёд мегардад. Ин иншооти сайёҳӣ аз чор марҳилаи сохтмонӣ иборат буда, то ҷашни 40-солагии Истиқлоли давлатӣ ба истифода дода мешавад. Дар он ба масофаи зиёда аз 5 километр таноброҳ сохта мешавад.

Тавре 7 июли соли равон зимни шиносоии Президенти мамлакат муҳтарам Эмомалӣ Раҳмон бо лоиҳаи сармоягузории ин иншоот иттилоъ дода шуд, масоҳати умумии ин комплекси сайёҳӣ 15 гектарро ташкил дода, дар доираи лоиҳаи оянда дар ин мавзеъ меҳмонхонаи зебо барои қабули 1000 сайёҳи дохиливу хориҷӣ дар як вақт сохта шуда, 100 нафар соҳиби ҷойи кори доимӣ мегарданд.

Ифтитоҳи иншооти гуногунтаъйинот дар деҳаҳои ноҳияи Шаҳристон тадбирҳои муҳим дар самти рушди деҳот ва ҷалби ҳар чи бештари сайёҳони дохиливу хориҷӣ ба Тоҷикистон арзёбӣ гардид.

Дар ин зимн ба масъулин ҷиҳати рушди устувори сайёҳӣ дар шароити кӯҳӣ, бунёди шакли нави осоишгоҳҳо барои сайёҳон ва ҷавобгӯи талаботи замони муосир дастуру тавсияҳо дода шуд.

АКС: Хадамоти матбуоти Президенти Ҷумҳурии Тоҷикистон