Дар Масқат рушди ҳамкории Тоҷикистону Умон дар соҳаҳои гуногун баррасӣ шуд

ДУШАНБЕ, 13.07.2026 /АМИТ «Ховар»/. Вазъи кунунӣ ва дурнамои рушди ҳамкории Тоҷикистону Умон дар соҳаҳои мероси фарҳангӣ, сайёҳӣ ва дигар самтҳои мавриди таваҷҷуҳ 12 июл дар шаҳри Масқат зимни мулоқоти Сафири Фавқулода ва Мухтори Ҷумҳурии Тоҷикистон дар Салтанати Умон Зубайдулло Зубайдзода бо Вазири мерос ва сайёҳии Салтанати Умон Саид Иброҳим ибни Саил Ал-Бусаидӣ баррасӣ гардид. Дар ин хусус ба АМИТ «Ховар» аз Сафорати Ҷумҳурии Тоҷикистон дар Салтанати Умон хабар доданд.

Ҳамчунин дар мулоқот ҷонибҳо масъалаҳои таҳкими ҳамкории дуҷониба дар бахши сайёҳӣ, тавсеаи робитаҳои байниидоравӣ, ташкили сафарҳои мутақобили ҳайатҳои расмӣ ва сайёҳӣ, инчунин татбиқи ташаббусҳои муштаракро муҳокима намуданд.

Дар ҷараёни суҳбат аҳаммияти тавсеаи ҳамкории амалӣ, табодули таҷриба ва истифодаи самараноки имконияти мавҷуда барои таҳкими муносибатҳои дӯстона ва рушди ҳамкории мутақобили судманд таъкид гардид.

Ҷонибҳо барои идомаи муколамаи созанда ва густариши ҳамкорӣ изҳори омодагӣ карданд.

АКС: Сафорати Ҷумҳурии Тоҷикистон дар Салтанати Умон