Дар минтақаи Кӯлоб шумораи нафақагирон беш аз 127 ҳазор нафарро ташкил медиҳад

ДУШАНБЕ, 27.07.2026 /АМИТ «Ховар»/. Дар минтақаи Кӯлоб 127 ҳазору 552 нафар нафақагирон сабти ном шудаанд, ки 72 ҳазору 404 нафарашон маъюбон мебошанд. Дар ин хусус 24 июл зимни нишасти матбуотии Раёсати Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон дар минтақаи Кӯлоб иттилоъ дода шуд.

Иброз гардид, ки таъминоти нафақа самти асосии сиёсати иҷтимоии давлату ҳукумат ба ҳисоб меравад. Ҳадафи асосии он ба мусоидат ба рушди сармояи инсонӣ ва дастгирии иҷтимоии шаҳрвандон дар давраҳои пиронсолӣ, маъюбӣ, маҳрум шудан аз саробон ва дигар ҳолатҳои пешбинишуда равона гардидааст.

Дар ҷараёни нишасти матбуотӣ иттилоъ дода шуд, ки дар минтақаи Кӯлоб ҳарчанд хизматрасонӣ ба нафақагирон ба таври қаноатбахш ба роҳ монда шудааст, аммо тибқи барномаи «Шинохти чеҳра» аксари нафақагирон сари вақт аз қайд нагузаштанд.

Масъулони Раёсати Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон дар минтақаи Кӯлоб мушкилоти асосии ин самтро ба дуруст ва ба таври зарурӣ кор накардани интернет ва сари вақт ҳозир нашудани нафақагирон рабт медиҳанд.

АКС: АМИТ «Ховар»