Дар нимсолаи якуми соли 2026 қурби расмии доллари амрикоӣ нисбат ба сомонӣ 0,17 фоиз баланд шуд

ДУШАНБЕ, 21.07.2026 /АМИТ «Ховар»/. Дар нимсолаи якуми соли равон қурби расмии доллари амрикоӣ нисбат ба сомонӣ ба андозаи 0,17 фоиз баланд шуд (аз 9,2513 сомонӣ дар санаи 31.12.2025 то ба 9,2674 сомонӣ дар санаи 30.06.2026). Дар ин хусус имрӯз зимни нишасти матбуотӣ Раиси Бонки миллии Тоҷикистон Фирдавс Толибзода ба хабарнигорон иттилоъ дод.

Гуфта шуд, ки дар ин давра Бонки миллии Тоҷикистон сиёсати қурбиро дар реҷаи «шинокунандаи танзимшаванда, бе муайян ва эълон кардани ҳудудҳои тағйирёбии қурб» идома дод.

Инчунин бо назардошти вазъи мураккаби иқтисоди ҷаҳон дар ин давра қурби расмии асъори миллии аксари кишварҳои шарики асосии тиҷоратии Ҷумҳурии Тоҷикистон тағйир ёфтанд.

Аз ҷумла, қурби тангаи Қазоқистон 3,33 фоиз, юани Чин 3,1 фоиз ва рубли Федератсияи Русия 0,60 фоиз устувор гардида, лираи Туркия 8,62 фоиз, рубли Беларус 0,13 фоиз, суми Узбекистон 0,30 фоиз ва соми Қирғизистон 0,04 фоиз нисбат ба доллари амрикоӣ коҳиш ёфт.

Марзия САИДЗОДА,
АМИТ «Ховар»

АКС: АМИТ «Ховар»