Дар шаш моҳ беш аз 199 ҳазор сайёҳ маконҳои таърихӣ-фарҳангии шаҳри Кӯлобро тамошо намуданд

ДУШАНБЕ, 26.07.2026 /АМИТ «Ховар»/.  Дар шаш моҳи соли 2026  199 ҳазору 206 нафар сайёҳони дохилию хориҷӣ бо мавзеъҳои таърихию фарҳангии шаҳри Кӯлоб шинос гардиданд. Аз ин шумора 5738 нафар гардишгарони хориҷӣ ва 193 ҳазору 468 нафар сайёҳони дохилӣ мебошанд. Дар ин хусус ба АМИТ «Ховар» аз шуъбаи рушди сайёҳии минтақаи Кӯлоб хабар доданд.

Иттилоъ дода шуд, ки дар шаҳри Кӯлоб 19 меҳмонхона, 16 тарабхона, 10 истироҳатгоҳу осоишгоҳ, 7 мавзеи сайёҳӣ, 5 зиёратгоҳ, 4 осорхона, 4 мағозаи армуғонҳо, 4 чойхона ва 3 нуқтаи иттилоотии сайёҳӣ барои қабули меҳмонони дохиливу хориҷӣ фаъолият менамоянд.

Шаҳри Кӯлоб дорои таърихи беш аз 2700-сола буда, яке аз қадимтарин марказҳои тамаддуни тоҷикон мебошад. Захираҳои бойи таърихӣ, фарҳангӣ ва табиии ин шаҳр ҳамчун яке аз самтҳои муҳими сайёҳии минтақа ва мамлакат ба ҳисоб мераванд.

Сайёҳон ба ин минтақа бештар бо мақсади тамошои мавзеъҳои таърихию фарҳангии Осорхонаи Пешвои миллат дар ноҳияи Данғара, Қалъаи Ҳулбук дар ноҳияи Восеъ, Осорхонаи 2700-солагии шаҳри Кӯлоб, Мир Сайид Алии Ҳамадонӣ, инчунин табиати нотакрори мавзеъҳои сайёҳии ноҳияҳои Балҷувону Ховалинг, Муъминобод, Шамсиддин Шоҳин, аз ҷумла Сари Хосор, Чилдухтарон ва оромгоҳи Султон Увайси Қаранӣ мераванд.

Маҳсули дасти занони ҳунарманди ин шаҳр диққати сайёҳонро ба ин макон бештар ҷалб намудааст. Чакандӯзӣ, порадӯзӣ, гулдӯзӣ, кулолгарӣ ва табақтарошӣ аз ҷумлаи ҳунарҳое мебошанд, ки на танҳо барои ҷалби сайёҳон, балки ба рушди иқтисоди хонаводагӣ ва афзоиши ҷойи кор мусоидат менамоянд.

Инчунин ҳунари хӯрокпазии занони ҳунарманди Кӯлобшаҳр ҷузъи ҷолиби сайёҳии ин минтақа ба шумор меравад. Онҳо анвои гуногуни хӯрокҳои миллӣ, аз қабили қалама, таҳмол, оши бурида, оши палав, қурутоб, манту, ширбат, шӯрбо, ширбиринҷ, ширруған, шакароб ва нашоистаро бо маҳорати баланд омода менамоянд.

Сайёҳон ва меҳмонони шаҳр ҳангоми шиносоӣ аз бозорҳо, мавзеъҳои сайёҳӣ ва чорабиниҳои фарҳангӣ аз ин таомҳои хушлаззат мечашанд ва бо таъми хоси хӯрокҳои миллӣ ошно мегарданд. Ба ақидаи мутахассисони соҳаи сайёҳӣ, маҳз ҳамин навъи ҳунари занони маҳаллӣ метавонад барои рушди сайёҳии гастрономӣ дар минтақа заминаи мусоид фароҳам оварад.

Бояд гуфт, ки сайёҳӣ дар мамлакат яке аз соҳаҳои афзалиятноку даромаднок буда, аз ин ҳисоб маблағҳои зиёд ба буҷаи давлат ворид гардида, барои рушди иқтисодиёти мамлакат пурсамар истифода бурда мешаванд.

Тоҷикистон дар баробари дигар давлатҳои минтақа ва ҷаҳон нисбат ба рушди соҳаи сайёҳӣ имконияти хеле калон дорад. Агар ин имконот пурра истифода шаванд, ҳамасола сайёҳони зиёди хориҷӣ ба мамлакати мо барои тамошои маконҳои ҷолиб меоянд.

АКС аз манбаъҳои боз