Дар Тоҷикистон сомонаи сифати ҳаво фаъол гардид

ДУШАНБЕ, 18.07.2026 /АМИТ «Ховар»/. Аз ҷониби Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон дар ҷумҳурӣ сомонаи сифати ҳаво таҳия гардида, ба фаъолият шуруъ намуд. АМИТ «Ховар» бо истинод ба Агентии обуҳавошиносӣ иттилоъ медиҳад, ки шаҳрвандон метавонанд вобаста ба ҳолати воқеии сифати ҳаво дар мамлакат аз ин сомона бо забонҳои тоҷикӣ, русӣ ва англисӣ маълумоти дақиқ пайдо намоянд.

Дар айни замон дар 9 минтақаи ҷумҳурӣ, аз ҷумла дар 6 минтақаи шаҳри Душанбе–дар мавзеи Боғи фарҳангию фароғатии ба номи С.Айнӣ, хиёбони Рӯдакӣ, Институти физикию техникаи ба номи С.У.Умарови Академияи миллии илмҳои Тоҷикистон, Мактаби байналмилалии президентӣ, шаҳракҳои 65 ва 103, инчунин дар шаҳрҳои Кӯлоб, Ваҳдат ва Ҳисор таҷҳизоти худкори ташхиси сифати ҳаво насб гардидаанд.

Сомонаи мазкур ба таври онлайнӣ фаъол буда, дар он харитаи ҷойгиршавии таҷҳизот, маълумоти сифати ҳаво дар намуди графикҳо бо нишондоди заррачаҳои 10мкр (Рм-10) ва 2,5мкр (Рм2,5) барои муайяннамоии индекси сифати ҳаво ва тавсияву маълумот ҷойгир карда шудааст.

Дар сомона шаҳрвандон метавонанд бо маълумоти зерин:

1. Сомонаи сифати ҳаво бо нишондоди индекси ҷаҳонии сифати ҳаво, ҳолати сифати ҳаво, консентратсияи заррачаҳои 2,5микрона (Рм-2,5) инчунин омилҳои метеорологӣ (ҳарорат, суръати шамол ва намнокии ҳаво);

2. Номгӯи нуқтаҳои мушоҳидавӣ бо нишондоди консентратсияи заррачаҳои андозаашон то 2,5 ва 10 микрона (Рм-2,5), (Рм-10), инчунин индекси сифати ҳаво;

3. Харитаи ҷойгиршавии нуқтаҳои мушоҳидавии сифати ҳаво дар ҷумҳурӣ;

4. Маълумоти сифати ҳаво дар намуди график бо нишондоди заррачаҳои андозаашон то 2,5 микрона (Рм-2,5) ва 10 микрона (Рм-10);

5. Рейтинги нуқтаҳои мушоҳидашаванда бо нишондоди индекси сифати ҳаво, инчунин консентратсияи Рм-2,5 ва Рм-10;

6. Тавсияҳои тиббӣ ҳангоми хавфи ифлосшавии ҳаво;

7. Маълумоти бештар дар бораи сифати ҳаво шинос шаванд.

Бо назардошти гирифтани маълумот аз 9 минтақаи ҳудуди ҷумҳурӣ индекси миёнаи сифати ҳаво (AQI) муайян гардида, нишондиҳандаи универсалӣ вобаста ба ҳолати воқеии сифати ҳаво дар харита нишон дода мешавад. Сомонаи мазкур ягона манбае мебошад, ки дар он дақиқияти сифати ҳаво дар Ҷумҳурии Тоҷикистон бо истифода аз моделҳои ҷаҳонӣ муайян карда мешавад.

АКС: Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон