Дурнамои ҳамкорӣ байни Тоҷикистон ва Қатар дар соҳаи саноат баррасӣ гардид

ДУШАНБЕ, 02.07.2026 /АМИТ «Ховар»/. Дар Вазорати саноат ва технологияҳои нави Ҷумҳурии Тоҷикистон бо иштироки ҳайати ширкати «Al Faisal Holding»-и Давлати Қатар вохӯрӣ доир гардид, ки дар он дурнамои рушди ҳамкорӣ баррасӣ шуд, иттилоъ медиҳад АМИТ «Ховар» бо истинод ба Вазорати саноат ва технологияҳои нави Ҷумҳурии Тоҷикистон.

Дар мулоқот тақвияти ҳамкории дуҷониба баррасӣ шуда, ҷонибҳо омодагии худро барои таҳкими ҳамкории мутақобилан судманд тасдиқ карданд.

Таваҷҷуҳи асосӣ ба масъалаҳои ҷалби сармоя ва татбиқи лоиҳаҳои муштарак дар бахшҳои авлавиятноки саноат, аз ҷумла саноати кӯҳӣ, алюминий, истеҳсоли масолеҳи сохтмон, саноати хӯрокворӣ ва рушди истеҳсолоти муосири саноатӣ равона гардид.

Вазири саноат ва технологияҳои нав Шералӣ Кабир иқтидори саноатӣ ва сармоягузории ҷумҳуриро муаррифӣ намуда, аз шароити мусоиди пешбурди фаъолияти соҳибкорӣ ва имкониятҳои васеи татбиқи лоиҳаҳои мутақобилан судманди сармоягузорӣ дар самти саноат ёдовар шуд.

Мусоҳибон омодагии худро барои густариши минбаъдаи ҳамкорӣ ва идомаи муколамаи созанда барои баррасии самтҳои ояндадори ҳамкорӣ изҳор намуданд.

АКС: Вазорати саноат ва технологияҳои нави Ҷумҳурии Тоҷикистон