Эмомалӣ Раҳмон: «Маҷмааи металлургии Тоҷикистон даҳҳо корхона ва ҳазорон ҷойи нави кор таъсис медиҳад»

ДУШАНБЕ, 11.07.2026 /АМИТ «Ховар»/. Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон 9 июл зимни суханронӣ дар мулоқот бо роҳбарону фаъолони вилояти Суғд ва кормандони соҳаи саноати кишвар дар ноҳияи Бобоҷон Ғафуров изҳор намуданд, ки имрӯз дар Тоҷикистон барои ташаккули маҷмааи мукаммали металлургӣ асос гузошта мешавад ва тамоми марҳалаҳои истеҳсолот — аз истихроҷи маъдан то коркарди металл, истеҳсоли масолеҳи сохтмон ва рушди инфрасохтори нақлиётиву энергетикиро ҳамчун низоми ягона ба ҳам мепайвандад.

Ба андешаи Сарвари давлат, ашёи хоми асосии барои рушди металлургияи сиёҳ зарурӣ, аз ҷумла маъдани оҳан, ангишт, бентонит ва оҳак дар дохили кишвар мавҷуд буда, имкон медиҳад, ки занҷираи истеҳсолот асосан бо истифода аз захираҳои ватанӣ таъмин карда шавад.

Пешвои миллат таъкид намуданд, ки чунин муносибат барои таъсиси даҳҳо корхонаи нав ва ҳазорон ҷойи нави кор дар атрофи истеҳсолоти асосӣ замина фароҳам меорад ва имконоти рушди саноати мамлакатро боз ҳам васеъ мегардонад.

Иброз гардид, ки рушди металлургияи сиёҳ ба ҳалли масъалаи шуғли аҳолӣ ҳам аз ҳисоби таъсиси ҷойи кори мустақим ва ҳам ғайримустақим мусоидат мекунад.

Президенти мамлакат тазаккур доданд, ки корхонаҳои соҳавӣ барои муҳандисон, металлургҳо, муҳандисони барқ, мутахассисони технологияҳои иттилоотӣ ва дигар кормандони соҳавӣ ҷойи кори доимӣ бо музди меҳнати муносиб пешниҳод менамоянд. Ҳамчунин бо рушди истеҳсолоти асосӣ дар минтақа шабакаи васеи корхонаҳои хурду миёна ва хизматрасонӣ ташаккул ёфта, барои табдил ёфтани маҳалли ҷойгиршавии корхона ба маркази нави саноатӣ замина фароҳам меояд.

АКС: АМИТ «Ховар»