Эмомалӣ Раҳмон: «Металлургияи миллӣ заминаи истиқлоли саноатии мамлакат аст»

ДУШАНБЕ, 10.07.2026 /АМИТ «Ховар»/. Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон 9 июл зимни суханронӣ дар мулоқот бо роҳбарону фаъолони вилояти Суғд ва кормандони соҳаи саноати кишвар дар ноҳияи Бобоҷон Ғафуров хотиррасон намуданд, ки истиқлоли металлургӣ ба давлат имкон медиҳад, ки лоиҳаҳои бузурги инфрасохториро сарфи назар аз таҳримҳо ва таъсири омилҳои буҳронии берунӣ амалӣ намояд.

Сарвари давлат  дар идома илова намуданд, ки рушди металлургияи миллӣ барои бунёди шаҳракҳои нави саноатӣ, роҳу нақбҳои стратегӣ, пулҳои бузурги мошингузар, иншооти варзишиву фароғатӣ, неругоҳҳои хурду бузург ва дигар иншооти муҳими иҷтимоиву иқтисодӣ заминаи мусоид фароҳам меорад.

Пешвои миллат изҳор намуданд, ки мавҷудияти занҷираи пурраи истеҳсолии металлургӣ дар дохили кишвар нишонаи сатҳи баланди рушди саноат буда, барои қонеъ намудани талаботи бозори дохилӣ бо маҳсулоти ватанӣ аҳаммияти стратегӣ дорад.

Тавре таъкид гардид, давлатҳое, ки имконияти таъмини бозори дохилиро бо маҳсулоти аз оҳан истеҳсолшуда доранд, метавонанд дар бахшҳои сохтмон, мудофиа ва рушди инфрасохтор истиқлоли комили саноатиро таъмин намоянд.

Президенти мамлакат ҳамчунин аҳаммияти иқтисодии ин соҳаро назаррас арзёбӣ намуда, таъкид доштанд, ки тибқи таҳлилҳои байналмилалӣ, ҳар ҷойи нави кор дар соҳаи металлургияи сиёҳ метавонад то ҳафт ҷойи кори дигарро дар бахшҳои вобаста, аз ҷумла саноат, сохтмон, энергетика, нақлиёт, иқтисод ва илм ба вуҷуд оварад.

Ба таъкиди Роҳбари давлат, металлургияи сиёҳ ба рушди энергетика низ такони ҷиддӣ бахшида, барои бунёди неругоҳҳои нави барқӣ, таҷдиди шабакаҳои интиқоли неруи барқ ва рушди дигар бахшҳои стратегии иқтисоди миллӣ аҳаммияти калидӣ дорад.

АКС: АМИТ «Ховар»