Файзалӣ Идизода бо Раиси Маҷлиси Шурои Подшоҳии Арабистони Саудӣ вохӯрӣ намуд

ДУШАНБЕ, 02.07.2026 /АМИТ «Ховар»/. Имрӯз Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода бо Раиси Маҷлиси Шурои Подшоҳии Арабистони Саудӣ доктор Абдуллоҳ ибни Муҳаммад ибни Иброҳим оли Шайх, ки бо сафари расмӣ дар Тоҷикистон қарор дорад, вохӯрӣ намуд. Дар ин хусус ба АМИТ «Ховар» аз Маҷлиси намояндагон хабар доданд.

Иброз гардид, ки бо шарофати сиёсати хирадмандонаву ояндасози Президенти Ҷумҳурии Тоҷикистон муҳтарам Эмомалӣ Раҳмон ва иродаи пайгиронаи Ходими Ҳарамайни Шарифайн Подшоҳи Подшоҳии Арабистони Саудӣ муҳтарам Салмон ибни Абдулазиз Оли Сауд, инчунин Валиаҳд ва Сарвазири ин мамлакат муҳтарам Муҳаммад ибни Салмон, муносибатҳои ду давлат имрӯз ба сатҳи сифатан нав баромада, дар соҳаҳои сиёсӣ, иқтисодӣ, сармоягузорӣ, фарҳангӣ ва гуманитарӣ мунтазам рушд доранд.

«Мо бар он боварем, ки ин сафар яке аз рӯйдодҳои муҳими муносибатҳои Тоҷикистону Подшоҳии Арабистони Саудӣ маҳсуб ёфта, барои таҳкими ҳамкории байнипарлумонӣ ва густариши шарикии дуҷониба мусоидат хоҳад намуд», — баён намуд Файзалӣ Идизода.

Гуфта шуд, ки ҳамкории иқтисодию сармоягузории ду давлат низ давра ба давра густариш ёфта истодаанд.

Дар ин замина Маҷлиси намояндагон нақши дипломатияи парлумониро ҳамчун воситаи муҳими таҳкими муносибатҳои байнидавлатӣ ва тақвияти эътимоди мутақобил баланд арзёбӣ менамояд.

Раиси Маҷлиси намояндагон Файзалӣ Идизода баён намуд, ки натиҷаҳои сафари Раиси Маҷлис аш-Шурои Подшоҳии Арабистони Саудӣ доктор Абдуллоҳ ибни Муҳаммад ибни Иброҳим Оли аш-Шайх ба Тоҷикистон барои таҳкими минбаъдаи ҳамкории байнипарлумонӣ, ҳамдигарфаҳмӣ, густариши дӯстиву бародарии мардумони ду давлат, тавсеаи фаъолияти гурӯҳҳои дӯстӣ, густариши робитаҳои тиҷоратию иқтисодӣ ва сармоягузорӣ, инчунин ҳамкорӣ дар соҳаҳои энергетика, саноат, кишоварзӣ, маориф, илм, фарҳанг ва сайёҳӣ такони нав мебахшанд.

АКС: АМИТ «Ховар»