Хатсайри қатораи Душанбе – Москва — Душанбе пас аз 6 сол барқарор гардид
ДУШАНБЕ, 04.07.2026 /АМИТ «Ховар»/. Пас аз шаш соли таваққуф, ҳаракати қатораи мусофирбар дар хатсайри байналмилалии Душанбе – Москва дубора барқарор гардид.
Ин рӯйдоди муҳим дар рушди низоми нақлиёти роҳи оҳани кишвар арзёбӣ шуда, барои садҳо мусофир имкони сафарро бо роҳи қулай, бехатар ва дастрас фароҳам овард.
Нахустин қатора рӯзи 21 июн аз шаҳри Душанбе ба роҳ баромада, пас аз тай намудани масири тақрибан чор шабонарӯз, ба шаҳри Москва расид. Дар ин муддат қатора аз қаламрави чаҳор давлат — Тоҷикистон, Узбекистон, Қазоқистон ва Русия гузашта, ҳазорон километр роҳро тай намуд.
Дар истгоҳи роҳи оҳани Москва мусофиронро наздикону пайвандон бо эҳсоси гарму самимӣ истиқбол гирифтанд.
Мусофирон аз шароити сафар изҳори қаноатмандӣ намуда, таъкид карданд, ки ҳаракати дубораи қатора барои онҳо имконияти муносиб фароҳам овардааст.
Ба гуфтаи онҳо, сафар бо роҳи оҳан на танҳо аз ҷиҳати иқтисодӣ дастрас аст, балки барои оилаҳо, кӯдакон, донишҷӯён ва муҳоҷирони меҳнатӣ низ бароҳат ба ҳисоб меравад.
Онҳо ҳамчунин иброз доштанд, ки солҳои зиёд мунтазири ин хатсайр буданд ва имрӯз бо хушҳолӣ шоҳиди амалишавии ин иқдом гардиданд.
Ҳамзамон барои мусофироне, ки чиптаро пешакӣ харидорӣ мекунанд, тахфифҳои махсус пешбинӣ гардидааст. Масалан, агар чиптаи вагони пласкарт аз 45 то 41 рӯз пеш аз сафар харидорӣ шавад, арзиши он аз 3390 сомонӣ то 1685 сомонӣ коҳиш меёбад. Инчунин барои вагони купе дар ҳамин муҳлат нархи чипта аз 4629 сомонӣ то 2618 сомонӣ пешниҳод мешавад. Масъулон мегӯянд, чунин имтиёзҳо барои ҳавасманд намудани хариди пешакии чиптаҳо ва дастрас кардани хизматрасонӣ ба мусофирон ҷорӣ гардидааст.
Масъулон таъкид мекунанд, ки барқарории ҳаракати қатора дар доираи ҳамкории Тоҷикистону Русия роҳандозӣ гардида, барои таъмини амнияти мусофирон, беҳтар намудани сифати хизматрасонӣ ва фароҳам овардани шароити мусоид тамоми тадбирҳои зарурӣ андешида шудаанд.
Қатораи Душанбе – Москва бо вагонҳои мусофирбаре фаъолият мекунад, ки барои сафарҳои тӯлонӣ мутобиқ буда, дорои ҷойҳои хоб, низоми ҳавотозакунӣ ва дигар шароити зарурӣ мебошанд.
Барқарор шудани ин хатсайри байналмилалӣ пас аз шаш соли танаффус на танҳо имконияти нави сафарро барои шаҳрвандон муҳайё месозад, балки ҳамчун қадами муҳим дар таҳкими ҳамкории иқтисодӣ, иҷтимоӣ ва фарҳангии Тоҷикистону Русия арзёбӣ гардида, аз густариши бештари робитаҳои дӯстонаи ду кишвар дарак медиҳад.










Бо сабаби фаъолият накардани корхонаи «Хишти Тоҷикобод» сокинон ин масолеҳи сохтмониро аз Душанбе ва Ваҳдат бо роҳкирои гарон ворид менамоянд
Дар Минтақаи озоди иқтисодии «Ишкошим» ба маблағи беш аз 1 миллион сомонӣ кору хизматрасонӣ анҷом дода шуд
Дар доираи ҷаласаи 45-уми пленарии ГАО ҳамоиш баргузор гардид
Тоҷикистон барои мубориза бо тағйирёбии иқлим ва ҳифзи пиряхҳо иқдомҳои мушаххасро тақвият мебахшад
Душанбе мизбони конференсияи миллӣ ва Намоишгоҳи технологияҳои рақамӣ дар соҳаи кишоварзӣ мегардад
Тоҷикистон ва Озарбойҷон ҳамкориро дар соҳаи ҳифзи муҳити зист тақвият медиҳанд
Дар Душанбе ҷаласаи 45-уми пленарии ГАО оғоз шуд
Раванди татбиқи низоми электронии сертификатсияи фитосанитарӣ дар Тоҷикистон баррасӣ гардид
Ҳамкории Палатаи ҳисоби Тоҷикистон ва Додгоҳи ҳисоби Туркия густариш меёбад
«ПАРДОХТИ ЯГОНАИ КОММУНАЛӢ». Низоми нав пардохтро барои сокинон осонтар, равшантар ва шаффофтар мегардонад
Ҳаҷми истеҳсоли маҳсулоти кишоварзӣ дар Хатлон ба 42,5 миллиард сомонӣ баробар шуд
Тоҷикистон ният дорад то соли 2035 партовҳои газҳои гулхонаиро то 40 фоиз коҳиш диҳад






