Исфандиёри Саъдулло бо директори генералии ҶСО «МегаФон»-и Федератсияи Русия вохӯрӣ намуд

ДУШАНБЕ, 10.07.2026 /АМИТ «Ховар»/. 9 июл Сардори Хадамоти алоқаи назди Ҳукумати Ҷумҳурии Тоҷикистон Исфандиёри Саъдулло бо директори генералии Ҷамъияти саҳомии оммавии «МегаФон»-и Федератсияи Русия Хачатур Помбухчан вохӯрӣ намуд.

Тавре ба АМИТ «Ховар» аз Хадамоти алоқаи назди Ҳукумати Ҷумҳурии Тоҷикистон иттилоъ доданд, дар мулоқот масъалаҳои баланд бардоштани сифати хизматрасониҳои телекоммуникатсионӣ, таъмини фаъолияти устувору бефосилаи шабакаҳо, суръат бахшидан ба амалӣ намудани технологияҳои нав, густариши фарогирии шабакаҳои алоқа, риояи талаботи қонунгузории Ҷумҳурии Тоҷикистон ва иҷрои пурраи уҳдадориҳои ширкат мавриди баррасӣ қарор гирифтанд.

Исфандиёри Саъдулло афзуд, ки Хадамоти алоқа ҳамчун мақоми ваколатдори давлатӣ барои таъмини рақобати солим, ҳифзи ҳуқуқу манфиатҳои истифодабарндагон, баланд бардоштани сифати хизматрасониҳо ва рушди устувори инфрасохтори рақамии мамлакат тадбирҳои заруриро амалӣ менамояд.

Дар вохӯрӣ ҷонибҳо оид ба баланд бардоштани сатҳу сифати хизматрасониҳои ширкат дар қаламрави Ҷумҳурии Тоҷикистон, татбиқи лоиҳаҳои муштарак, ҷалби сармоягузорӣ, ворид намудани технологияҳои муосир, мубодилаи таҷрибаи пешрафта ва омодасозии кадрҳои баландихтисос мубодилаи афкор намуданд.

АКС: Хадамоти алоқаи назди Ҳукумати Ҷумҳурии Тоҷикистон