«МЕРОСИ МО». Муассисаи фарҳангии ЭКО нахустин ҷашнвораи байналмилалии аксбардории мобилӣ баргузор менамояд

ДУШАНБЕ, 26.07.2026 /АМИТ «Ховар»/. Муассисаи фарҳангии Созмони ҳамкории иқтисодӣ /ЭКО/ таҳти унвони «Мероси мо» нахустин ҷашнвораи байналмилалии аксбардории мобилӣ баргузор менамояд, иттилоъ медиҳад АМИТ «Ховар» бо истинод ба ин муассиса.

Дар нахустин ҷашнвораи байналмилалии аксбардории мобилӣ таҳти унвони «Мероси мо» шаҳрвандони кишварҳои аъзои ЭКО имкон доранд осори худро бо меҳвари «Интиқоли мерос» аз 12 июл то 12 сентябри соли 2026 ирсол намоянд.

Ҳадафи ин ҷашнвора сабт ва бозтоб намудани лаҳзаҳои интиқоли дониш, маҳорат, ойинҳо ва суннатҳои фарҳангӣ аз насл ба насл мебошад. Дар ин рӯйдод тамоми шаҳрвандони кишварҳои аъзои ЭКО —Тоҷикистон, Афғонистон, Озарбойҷон, Эрон, Қазоқистон, Қирғизистон, Покистон, Туркия, Туркманистон ва Узбекистон метавонанд иштирок намоянд. Иштирокчиён бояд аксҳои худро, ки танҳо бо дурбини телефони ҳамроҳ гирифта шудаанд, тавассути сомонаи Муассисаи фарҳангии ЭКО ё аз тариқи почтаи электронии festival@ecieco.org ирсол кунанд.

Тибқи эълони Муассисаи фарҳангии ЭКО, ғолибон дар се бахши асосӣ муаррифӣ хоҳанд шуд. Ҳамчунин ба беҳтарин асар аз ҳар кишвари аъзо Лавҳи махсуси сипос тақдим мегардад. Маросими ҷамъбасти ҷашнвора ва намоишгоҳи осори баргузида моҳи октябри соли 2026 баргузор хоҳад шуд. Тафсилоти пурраи шартҳои иштирок, тарзи ирсоли осор ва низомномаи ҷашнвора тавассути сомонаи расмии Муассисаи фарҳангии ЭКО дастраси тамоми алоқамандон мебошад.

АКС аз манбаъҳои боз