Муассисаҳои таҳсилоти ибтидоии касбӣ пурра бо китобҳои дарсӣ таъмин мебошанд

ДУШАНБЕ, 14.07.2026 /АМИТ «Ховар»/. Дар айни замон 112 номгӯй китобҳои тахассусӣ ба чоп тавсия гардида, мавриди нашр қарор доранд. Барои таъмин ва таҳияи китобҳои дарсии тахассусӣ дар муассисаҳои таълимии таҳсилоти миёнаи касбӣ муаллифон аз ҳисоби омӯзгорони баландихтисоси муассисаҳои таълимии таҳсилоти миёна ва олии касбӣ ҷалб карда шудаанд. Дар ин хусус 13 июл Раиси Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон Фарҳод Раҳимӣ дар нишасти матбуотӣ ба хабарнигорон иттилоъ дод.

Фарҳод Раҳимӣ иброз дошт, ки сатҳи тайёр кардани кадрҳои коргарӣ аз босифат коркард шудани стандартҳо, нақшаю барномаҳои таълимӣ ва китобҳои дарсӣ вобастагӣ дорад. Ҳоло муассисаҳои таълимии таҳсилоти ибтидоии касбӣ пурра бо китобҳои дарсии фанҳои умумитаълимӣ таъмин буда, бо китобҳои дарсии фанҳои тахассусӣ 42,5 дарсад таъмин мебошанд.

Дар айни замон 13 номгӯй лоиҳаи китобҳои дарсии фанҳои тахассусӣ: «Асосҳои технологияи шабакаҳои интернетӣ», «Ҳунарҳои суннатии тоҷикон», «Гаҷкор», «Шабакаҳои компютерӣ», «Хиштчин», «Корҳои пардозгарӣ дар соҳаи сохтмон», «Асосҳои технологияи истифодабарӣ ва таъмири техникаи кишоварзӣ», «Фарҳанги мухтасари русӣ – тоҷикӣ ва англисӣ дар соҳаи сохтмон», «Харрот», «Тракторҳо», «Амсиласозӣ ва ороиши бадеии либос», «Вожаву истилоҳоти риштаи кафшергарӣ» ва «Муқаддимаи ҳуқуқи моликияти зеҳнӣ» барои чоп омода шудаанд.

Раъно НУСРАТУЛЛО,
АМИТ «Ховар»

АКС: АМИТ «Ховар»