Мулоқоти Раиси Маҷлиси намояндагон бо Раиси Кумитаи миллӣ оид ба ҳуқуқи инсони Давлати Қатар доир гардид

ДУШАНБЕ, 02.06.2026 /АМИТ «Ховар»/. Имрӯз вохӯрии Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода бо Раиси Кумитаи миллӣ оид ба ҳуқуқи инсони Давлати Қатар доктор Марям бинти Абдуллоҳ Ал-Аттийя баргузор шуд. Дар ин хусус АМИТ «Ховар» бо истинод ба Маҷлиси намояндагон хабар медиҳад.

Дар мулоқот таъкид шуд, ки натиҷаи вусъати ҳамкории дуҷониба байни ду давлат бозгӯи сиёсати пешгирифтаи Президенти Ҷумҳурии Тоҷикистон муҳтарам Эмомалӣ Раҳмон ва Аълоҳазрат Амири Давлати Қатар ҷаноби Шайх Тамим ибни Ҳамад Оли Сонӣ мебошад.

Бо дахли ҳифзи ҳуқуқу озодиҳо, Раиси Маҷлиси намояндагон иброз намуд, ки ҳифз ва таъмини ҳуқуқу озодиҳои инсон яке аз самтҳои муҳими сиёсати давлатии Ҷумҳурии Тоҷикистон буда, бо роҳнамоии Президенти Тоҷикистон муҳтарам Эмомалӣ Раҳмон дар мамлакат барои такмили қонунгузорӣ, таҳкими институтҳои миллӣ ва иҷрои уҳдадориҳои байналмилалӣ дар соҳаи ҳуқуқи инсон тадбирҳои пайгирона амалӣ гардида истодаанд.

Дар мулоқот ҳамзамон доир ба ташаббусҳои глобалии Ҷумҳурии Тоҷикистон ишора гардид. Аз ҷумла, гуфта шуд, ки қабули қатъномаи Созмони Милали Муттаҳид дар бораи «Даҳсолаи байналмилалӣ оид ба таҳкими сулҳ ба хотири наслҳои оянда, солҳои 2027-2036», ки аз ҷониби Ҷумҳурии Тоҷикистон пешниҳод гардид, аҳамияти ҷаҳонӣ дорад.

Ҳамзамон масъалаҳои марбут ба таҳкими муносибатҳои дӯстонаи Тоҷикистону Қатар, рушди ҳамкории мутақобилан судманд дар самти ҳифзи ҳуқуқу озодиҳои инсон ва тавсеаи муколамаи доимии созандаи байни ниҳодҳои давлатии ду мамлакат баррасӣ шуд.

АКС: Маҷлиси намояндагони Маҷлиси Олии Ҷумҳурии Тоҷикистон