НИШАСТИ МАТБУОТӢ. Аз ҳисоби андозҳо ва дигар пардохтҳои ҳатмӣ беш аз 17 миллиард сомонӣ ба буҷети давлатӣ ворид гардид

ДУШАНБЕ, 22.07.2026 /АМИТ «Ховар»/. Дар нимсолаи якуми соли равон иҷрои нақшаи андозҳо ва дигар пардохтҳои ҳатмӣ ба андозаи 123,3 фоиз таъмин гардида, ба буҷети давлатӣ 17 миллиарду 402 миллиону 500 ҳазор сомонӣ ворид гардид, ки нисбат ба нишондиҳандаҳои пешбинишуда 3 миллиарду 292 миллиону 400 ҳазор сомонӣ зиёд мебошад. Дар ин хусус имрӯз Раиси Кумитаи андози назди Ҳукумати Ҷумҳурии Тоҷикистон Нусратулло Давлатзода зимни нишасти матбуотӣ хабар дод.

Иҷрои нақшаи воридоти андозҳо ва пардохтҳо дар Вилояти Мухтори Кӯҳистони Бадахшон ба андозаи 100,2 фоиз, вилояти Хатлон 103 фоиз, вилояти Суғд 106,3 фоиз, шаҳри Душанбе 126,7 фоиз, дар шаҳру ноҳияҳои тобеи ҷумҳурӣ 109,4 фоиз ва Раёсати андозсупорандагони калон 141,6 фоиз таъмин гардид.

Гуфта шуд, ки дар давраи ҳисоботӣ 22 ҳазору 400 ҳолати ҳуқуқвайронкунии андозӣ асосан вобаста ба масъалаҳои бе қайд дар мақомоти андоз машғул шудан ба фаъолияти соҳибкорӣ, риоя накардани муҳлати пешниҳоди эъломияҳои андозӣ, риоя накардани тартиби истифодаи дастгоҳҳои назоратӣ-хазинавӣ ва рамзгузории электронии молҳо, сари вақт бо мақомоти андоз тартиб надодани санади муқоисавӣ ва дигар қонунвайронкуниҳо ошкор ва шахсони дахлдор ба ҷавобгарии маъмурӣ кашида шуданд. Нисбат ба онҳо ба маблағи умумии 113 миллион сомонӣ ҷаримаҳои маъмурӣ татбиқ гардида, аз ин ҳисоб ва аз ҳисоби ҷаримаҳои солҳои қаблӣ татбиқшуда ба буҷети ҷумҳуриявӣ зиёда аз 101 миллион сомонӣ маблағҳо ворид карда шуданд.

Раъно НУСРАТУЛЛО,
АМИТ «Ховар»

АКС: АМИТ «Ховар»