НИШАСТИ МАТБУОТӢ. Дар Комиссияи олии аттестатсионӣ 13 Шурои экспертӣ фаъолият доранд

ДУШАНБЕ, 08.07.2026 /АМИТ «Ховар»/. Дар назди Комиссияи олии аттестатсионии назди Президенти Ҷумҳурии Тоҷикистон 13 Шурои экспертӣ фаъолияти самаранок доранд, ки тамоми самтҳои асосии илмиро фаро мегиранд. Дар ин хусус имрӯз зимни нишасти матбуотӣ Раиси ин ниҳод Сайфиддин Давлатзода ба хабарнигор иттилоъ дод.

Аз 13 Шурои экспертӣ, 4 Шурои экспертӣ дар самти илмҳои табиӣ-математикӣ ва техникӣ, 3 Шуро дар самти илмҳои тиббӣ, фарматсевтӣ, биологӣ, байторӣ ва аграрӣ, 4 Шуро дар самти илмҳои ҷамъиятӣ ва 2 Шуро дар самти илмҳои гуманитарӣ фаъолият менамоянд.

Ҳамчунин таъкид шуд, ки бо мақсади такмили фаъолияти экспертӣ, таҳкими иқтидори илмӣ ва мутобиқ намудани ҳайати шуроҳо ба талаботи муқарраршуда, ба ҳайати як қатор шуроҳои экспертӣ тағйиру иловаҳои дахлдор ворид карда шуданд. Аз ҷумла, ҳайати шуроҳои экспертии «Фалсафа, сотсиология ва сиёсатшиносӣ», «Забоншиносӣ, адабиётшиносӣ, рӯзноманигорӣ ва тарҷумонӣ», «Физика, астрономия ва математика», «Иқтисодиёт ва соҳибкорӣ» ва «Ҳуқуқшиносӣ» таҷдид гардида, бо ҷалби мутахассисони соҳибтаҷриба ва олимони варзида такмил дода шуд.

Сайфиддин Давлатзода афзуд, ки комиссия дар нимаи дуюми соли 2026 нақша дорад, ки такмили низоми фаъолияти шуроҳои экспертӣ ва экспертизаи диссертатсияҳо дар асоси меъёрҳои муосири баҳогузорӣ, бо истифода аз таҷрибаи пешқадам амалӣ намояд.

Фирӯза ДАВЛАТЗОДА,
АМИТ «Ховар»

АКС: АМИТ «Ховар»