НИШАСТИ МАТБУОТӢ. Гардиши тиҷорати хориҷии Тоҷикистон дар шаш моҳи соли 2026 ба зиёда аз 6 миллиард доллар баробар гардид

ДУШАНБЕ, 21.07.2026 /АМИТ «Ховар»/. Дар шаш моҳи соли равон гардиши тиҷорати хориҷии Тоҷикистон ба 6 миллиарду 803,3 миллион доллар баробар гардид, ки нисбат ба ҳамин давраи соли 2025 беш аз 2 миллиард доллар зиёд аст.

Тавре Сардори Хадамоти гумруки назди Ҳукумати Ҷумҳурии Тоҷикистон Хуршед Каримзода 21 июл зимни нишасти матбуотӣ ба намояндагони расонаҳои хабарии ватанию хориҷӣ иттилоъ дод, дар ин давра ба ҷумҳурӣ дар ҳаҷми 5 миллиарду 224,3 миллион доллар молу маҳсулот воридот гардид, ки нисбат ба ҳамин давраи соли 2025 1 миллиарду 403,1 миллион доллар ё 36,7 фоиз зиёд аст. Содирот ба 1 миллиарду 579,0 миллион доллар баробар шуда, нисбат ба ҳамин давраи соли 2025 635,8 миллион доллар ё 67,4 фоиз афзоиш ёфтааст.

Хуршед Каримзода афзуд, ки дар сохтори умумии гардиши мол ҳиссаи воридот 76,8 фоиз ва содирот 23,2 фоизро ташкил медиҳад.

Дар ин давра аз ҷумҳурӣ ба хориҷи мамлакат ба маблағи 451,7 миллион доллар маъданҳо ва консентратҳо, 144,2 миллион доллар сурма ва маҳсулоти он, 116,8 миллион доллар алюминийи коркарднашуда, 73,5 миллион доллар нахи пахта, 39,2 миллион доллар маҳсулоти меваю сабзавот, 20,8 миллион доллар ресмони пахтагӣ ва 4,6 миллион доллар семент содирот карда шудааст.

Гуфта шуд, ки дар ин давра нисбат ба нимсолаи якуми соли 2025 содироти мол ба кишварҳои Чин ба андозаи 212,6 миллион доллар, Белгия 65,7 миллион доллар, Узбекистон 4,6 миллион доллар, Русия 19,9 миллион доллар, Қазоқистон 17,6 миллион доллар, Эрон 2,2 миллион доллар, Қирғизистон 2,3 миллион доллар афзоиш ёфта, ба давлатҳои Ҳоланд 194,3 миллион доллар, Покистон 8,4 миллион доллар, Туркия 6,3 миллион доллар, Фаронса 3,3 миллион доллар ва Туркманистон 0,6 миллион доллар коҳиш ёфтааст.

Марзия САИДЗОДА,
АМИТ «Ховар»

АКС: АМИТ «Ховар»